Astanada qaterli isikti emdeýdiń jańa tehnologııalary engizilýde. Bul týraly Densaýlyq saqtaý basqarmasy jáne Salaýatty ómir saltyn qalyptastyrý ortalyǵy elordanyń onkologııalyq ortalyǵynda Dúnıejúzilik qaterli isikpen kúres kúni onkologııalyq aýrýlardyń aldyn alý jáne erte anyqtaý boıynsha birlesken brıfıng barysynda málim boldy.
Qala ákimdigi habarlaǵandaı, shara barysynda qaterlik isikterdi emdeýde mýltı dıssıplınarlyq ádisti odan ári damytý máselesi talqylandy.
Astanada qaterli isikterdi dıagnostıkalaý men emdeýde jańa tehnologııalar qazirdiń ózinde qoldanylýda, atap aıtqanda, onkologııalyq ortalyq jańa zamanaýı jabdyqtar satyp aldy.
«Arnaıy kompıýterlik tomograftyń baqylaýymen 6 túr boıynsha qaterli isiktiń erte dıagnostıkasy men skrınıgteriniń jańa ádisteri engizilýde. Tekserýler memlekettik bıýdjet esebinen tegin júrgiziledi», - dep atap kórsetti Astana q. Onkologtar, radıologtar qaýymdastyǵynyń tóraǵasy, onkoortalyqtyń bas dárigeri Muhtar Tóleýtaev.
2016 jyly isikti emhanaǵa deıingi kezeńde anyqtaý úshin stereotaksıkalyq bıopsııa, jáne eshbir tyrtyqsyz, hırýrgııalyq kosmetıkalyq áserlerdiń kómegimen ÝDZ baqylaýymen kishi kólemdegi isikterdi kesip alyp tastaýǵa bolatyn vakýýmdyq aspırasıondyq bıopsııa qoldanyla bastady.
Jańa tehnologııalardy engizýdiń arqasynda aýrýdy erte kezeńde anyqtaý jaǵdaılary artty, mysaly, skrınıng arqyly raktyń anyqtalýy 100% qurady.
2016 jyldyń qorytyndysy boıynsha qaterli isikke shaldyǵý kórsetkishi 100 myń halyqqa shaqqanda 200,6 boldy, 2015 jyly bul kórsetkish 100 myńǵa 198,4 bolǵan. Naýqastarda qaterli isikterdiń anyqtalý kórsetkishiniń artýy skrınıngtik baǵdarlamalardyń engizilýimen jáne ózge óńirlerden keletin pasıentterdiń kóbeıýine baılanysty.
«Astana q. Onkologııalyq ortalyǵynda respýblıkada alǵash ret bas jáne moıyndaǵy isikter kezinde mıkrohırýrgııalyq qalpyna keltirý operasııalary - til, tómengi jaq plastıkasy, keýde qýysynyń, kishi jambas, qursaq qýysy organdaryna endovıdeohırýrgııalyq operasııalar engizildi», - dedi onkolog dáriger Muhtar Esenjanuly.
