«Bavarııa» kapıtany fýtboldan ketedi

Germanııanyń «Bavarııa» komandasynda kapıtandyq mindetti atqaryp júrgen Fılıpp Lam aldaǵy jazda fýtboldan ketetinin málimdedi. Bul týraly eurosport.ru habarlady. «Maýsym sońynda mansabymdy aıaqtaý týraly sheshimge keldim. Bul nıetimdi klýb basshylyǵyna bildirdim. Meniń fýtboldaǵy basty mindetim – ár oıynda barymdy salyp, aqtyq demim taýsylǵansha komandamdy jeńiske jeteleý. Jazǵa deıin bul qysymǵa shydarmyn, biraq ózim de biraz jasqa kelip qalǵandyqtan, ary qaraı jalǵastyra almaımyn. Sol sebepti fýtbolshylyq ǵumyrymdy birjola aıaqtasam dep otyrmyn. Ázirge demalǵym keledi. «Bavarııanyń» sport dırektory laýazymy usynylǵan. Biraq bul qyzmetke áli daıyn emes sııaqtymyn», – dedi nemis oıynshysy. Germanııanyń aqparat quraladary Lamnyń mundaı sheshimge kelgenin ótken aıdyń ortasynda habarlaǵan. Bul joly oıynshynyń ózi resmı túrde málimdep otyr. Aıta keteıik, «Bavarııa» sapynda búginge deıin 501 oıyn ótkizip, 19 júlde jeńip alǵan. Al Germanııa quramasymen 2014 jyly álem chempıony atanǵan.