Barıstaın: Chaves Alvaresti jeńse, sporttan ketemin

Dańq zalyna aty jazylǵan meksıkalyq bapker Ignasıo Barıstaın ózi jattyqtyratyn kishi Hýlıo Sezar Chaves aldaǵy jekpe-jekte Saýl «Kanelo» Alvaresti jeńse, sporttan ketýge daıyn ekenin aıtty. Bul týraly vesti.kz habarlady. 55 jylyn boksqa arnaǵan Barıstaın mansabyn qolaıly ýaqytta aıaqtaý sátin kútip júr. Onyń aıtýynsha aldaǵy kezdesý osy qadamǵa tolyq negiz bola alady. Sonymen birge, ol jurttyń nelikten Alvarestiń jeńisine senimmen qaraıtynyn túsinbeıdi. «Eger Hýlıo jeńse, qatty qýanar edim. «Kanelo» árıne, óte belsendi bolǵan soń kózge túsip júr. Al Hýlıo rıngke jıi shyqpaıdy, bul joly da qolynyń jaraqatyn emdep kelip otyr. Aldaǵy aıqasqa óte jaqsy daıyndyqpen shyǵady», – dedi Barıstaın. Aıta keteıik, qos meksıkalyq boksshynyń arasyndaǵy urys 6 mamyrda AQSh-tyń Las-Vegas qalasynda ótedi.