Namysty qoldan bermegen Qazaq eli álemdik deńgeıdegi bul sporttyq sharany dos súıinip, dushpan kúıinetindeı-aq deńgeıde dúrkiretip ótkizdi. Búgin biz, toı ótip, qonaq ketken soń, ózimiz otyryp shaı ishkende tap osylaı dep senimdi túrde aıta alamyz. Búkilálemdik stýdentter saıysyna 60-qa jýyq elden eki myńnan astam sportshy kelip, sporttyń 12 túri boıynsha 85 medal jıyntyǵy úshin tartysqa tústi. Munyń syrtynda, jarysqa arnaıy shaqyrylǵan mártebeli meımandar, maman-bapkerler, sportshylardyń shashbaýyn kótergen jankúıerler, osy dúbirli dodany paıdalanyp, Qazaqstandy, onyń arý Almatysyn kórip qalaıyn dep kelip qalǵan saıahatshylar sany qanshama boldy deseńizshi?! Osynshama nópir, synap kelgen, qyzyqqa kenelgisi kelgen qalyń jurt Almatynyń aıqara qushaǵyna enip, qazaǵymnyń qonaqjaı peıilin kórip, toıat tapty dep oılaımyz. «Kelgenshe qonaq uıalady, kelgen soń úı ıesi uıalady» degen ras. Qonaq kútýden aldyna jan salmaǵan qazaqy darqandyq tórtkúl dúnıe aldynda bizdiń mereıdi taǵy da kóterip tastady. Ýnıversıada tarıhynda tuńǵysh ret Almatyda turǵyn úıleriniń tóbesi kók tiregen «Atletter aýyly» salyndy. Bul jaıly da jyly úılerde turǵan sportshylardyń turmystyq jaı-kúıleriniń joǵary deńgeıde bolǵanyn kózben kórip, qulaqpen estidik te. Elbasy Nursultan Ábishuly Nazarbaev óziniń kezekti Joldaýynda 2020 jylǵa deıin Qazaqstan halqynyń 30 paıyzǵa jýyǵy buqaralyq sportqa tartylýy tıis degen naqty tapsyrma bergen edi. Osy Ýnıversıada úshin dep salynǵan sporttyq nysandar – «Halyq Arena» men «Almaty Arena» sport saraılary jáne basqa da ǵımarattar Prezıdent mindettegen múbárak sharýany iske asyrý jolynda múltiksiz qyzmet etetinine bek senýge bolady. Nege deseńiz, búgingi kúnde bizdiń halyq salamatty ómir saltyn qalap, dene shynyqtyrýmen turaqty túrde aınalysýǵa qatty den qoıa bastady. Onyń ústine atalǵan sporttyq ǵımarattar boı kótergen Alataý aýdanynda turǵyndar sany burynǵydan bir jarym esege artyp, búginde 200 myń adamǵa jetti. Mine, «Jaqsydan – sharapat» degen, elimizdi álemge taǵy bir márte tanytqan Ýnıversıada syndy halyqaralyq deńgeıdegi aýqymdy sporttyq sharanyń elge tıgizer paıdasynyń bir parasy osyndaı. Almatydan dúnıeniń túpkir-túpkirindegi óz elderine attanǵan órenderdiń júreginde tutanǵan Qazaqstanǵa, arý Almatyǵa degen mahabbat otynyń kópke deıin shuǵyla shashyp, shartarapqa tararyna sengiń keledi. Solardyń kóbiniń araǵa ýaqyt salyp, saıahatshy esebinde Almatyǵa at shaldyrmasyna kim kepil? Almaty-2017 qysqy Ýnıversıadasynyń ashylý jáne jabylý saltanattaryna, jarysty uıymdastyrýdaǵy sharýany urshyqsha úıire bilgen iskerligimizge qarap otyryp, shirkin-aı dep, Beıjińge buıyrǵan 2022 jylǵy Olımpıadanyń bizde ótpeıtindigine shyn ókingenimiz ras edi. Degenmen, «Igiliktiń erte-keshi joq», tórtjyldyqtyń basty dodasy túbi bir Almatyny tabary sózsiz degenge sengimiz keledi. Qazaqtan sóz qalǵan ba?! «Atyń barda jer tany jelip júrip, asyń barda el tany berip júrip» deıdi. Iá, biz qysqy Ýnıversıadany ekonomıkalyq múmkindikter shómishten qysqan kezde ótkizdik. О́ıtpeske taǵy bolmady: álem bizge «Áliń seniń qandaılyq?» degen syńaıda synaı qarap otyrǵandaı bolatyn. Eldiń ımıdji áldekimder aldynda basyn ımes úshin osyndaı nartáýekelge bel býǵanymyz da ras edi. Oıbaıǵa attan qosqandarǵa qarata aıtar bolsaq, bul – eldikke syn bolarlyq eren sharýa edi. Munyń shyǵyny da az emes, biraq bereri ony on orap alary sózsiz. Nege deseńiz, álemdik sport qaýymdastyǵy úshin bizdiń el senimdi áripteske aınaldy, týrıster úshin bizdiń jer tańǵajaıyby taýsylmas jumaqtaı áser qaldyrdy, qysqy sport úshin Almatymyz taptyrmas platforma-alańqaı retinde tanyldy. Al «Qoıandy» jármeńkesindegideı jurt oıdan-qyrdan aǵylǵan jerdiń qut-berekesi qashanda mol bolady! Búginde «Máńgilik Elimiz» damyǵan 30 memlekettiń qataryna qosylýdy murat etip otyr. Bul sanatqa iligýdegi kóp joldyń biri – tanymaldylyq bolsa kerek. Olaı bolsa, aýqymdy jobalarda baq synap, alqaly jurt-aıdaı álemniń aldynda dál osyndaı iri isimizben tanyla bergennen utpasaq, utylmasymyz anyq.
Qaırat ÁBILDINOV, «Egemen Qazaqstan»
