Úsh shal daıyn ba?
Jyl basynda ákimder atqarǵan jumystary jóninde halyq aldynda esep beretindigi qalyptasqan dástúr. Alaıda, basshylyq jasap júrgen jigitter tek maqtaný jaǵyna bar da, syn-eskertpe, usynysty tyńdaǵysy kelmeı, kózboıaýshylyqqa salynady. Bireý-mireý saýal qoıa qalsa, qaramaǵyndaǵylardy «durys jumys istemediń» dep tútip jeýge bar. Sondyqtan aýyldaǵy jaǵympazdar basshysynan sóz estimeý úshin arnaıy daıyndyq jasaıdy. Sondaı jınalystyń aldynda aýyl ákimi kómekshisinen: – Úsh shal daıyn ba? – deıtin kórinedi. Anaý da jylpos bolsa kerek: – Iá, baseke, daıyn. Úsh shaldyń bireýi jaýaby daıyn saýaldy qoıady, ekinshisi tilek aıtady, úshinshisi bata beredi, – dep lyp ete qaldy.Ádemi zaman
Jańaqorǵan aýdanynda uzaq jyldar boıy mekemelerde basshylyq qyzmet atqarǵan Tastemir Júzbaev aǵamyz sózsheń kisi edi. Birde esik aldynda aınalada bolyp jatqan jaǵymdy sharýalarǵa qarap otyryp, kóńili marqaıyp: – Shirkin-aı, jańa mektepter salynyp jatyr, sáýletti balabaqsha ǵımaraty áne! Aýdandaǵy aýrýhanamyz qandaı kórikti! Joldar taqtaıdaı tegis, túngi jaryǵy samaladaı! Osyndaı keremetterdi, ádemi zamandy kórip otyryp, tipti, jasyń toqsanǵa kelse de ólgiń kelmeıdi, – degen eken.Úrishke emes, kúrishke...
Aqyn Adyrbek Sopybekovtiń aýdandyq gazettiń redaktory qyzmetindegi kezi bolsa kerek. Birde bastyǵynyń kabınetine kire bergen hatshy qyz redaktordyń ústel sýyrmasyndaǵy zattaryn ári-beri aqtaryp, bir nársesin taba almaı alasuryp otyrǵandyǵyn kóredi. – Aǵaı, úrishke izdep jatyrsyz ba? – deıdi hatshysy kómekteskisi kelip. Redaktor úndemesten álgi áreketin jalǵastyra berse kerek. Qyz saýalyn taǵy da qaıtalaıdy. Sonda Adekeń: – Úrishke emes, kúrishke, – depti daýsy tarǵyldana shyǵyp. Ázirlegen Nurmahan ELTAI Qyzylorda oblysy
