«Men seni saǵynǵanda...»

«Meniń názik janymdy kim túsiner» dep ketken Muqaǵalı Maqataevtyń bolmysyn tereń tanyǵan Farıza apamyz aqyn ómirden ótkende «Jaraly jú­regimdi jarǵa soǵam, or­nyńdy esh tulǵamen toltyra almaı» dep, artynan «Ol endi suńqar jyrdyń qanatynda, kók teńbil Planetany aralaıdy» degen eken. Shynynda, Muqaǵalı qazir halyqtyq aqynǵa aınaldy. Ásirese, ózi ǵasyrlar kó­shinde jastardyń zamandasy bolamyn degeni buljymaı kelip, qazir tolqyn-tolqyn urpaqtyń syr­lasyna aınaldy. О́tken senbi kúni elordadaǵy Raıymbek batyr atyndaǵy №50 «Qazǵarysh» mektep-lıseıinde aqynnyń týǵan kúnine oraı «Men seni saǵynǵanda...» degen atpen ádemi kesh ótti. Kesh­ti bilim ordasynyń basshysy Roza Bolataeva ashyp, aqynnyń ómir jolyna, óleń órnekterine toqtaldy. Budan keıin oqýshylar Muqaǵalıdyń óleńderin oqyp, jınalǵandardy kúı kúmbirine bólep, bı yrǵaǵymen terbedi. Ustazdar qaýymy «Qosh, mahabbat!» atty dramasyndaǵy jastarǵa qajet turaqtylyq pen adaldyqty baıandaıtyn sátterdi ádemi kórinistermen alǵa tartty. Jalpy, órkenıetti elderde, onyń ishinde kórshimiz Reseı halqy A.Pýshkınnen bastap, N.Rýbsovqa deıingi ataqty aqyn­darynyń týǵan kúnin jyr álemine aınaldyryp, búkil el kóleminde atap ótip jatatyny belgili. Sondaı úrdis bizdiń Otanymyzda da qalyptassa, óleń dúnıesindegi alyptarymyzdy keıingi ur­paq tanyp, olardyń rýhanı qun­dylyǵynan nár alyp, ulttyń jaqsylaryn ardaq tutýdy úırener edi. Sonymen, óleń men qara sózdi ushtastyrǵan Muqa­ǵalı týyndylaryn ár qyrynan kelip túletýge mektep dırektorynyń orynbasarlary N.Ysqaqova men A.Imanbaevanyń, sol sekil­di kitap­hana meńgerýshisi A.Jaq­sylyqovanyń, qazaq tili pániniń muǵalimi G.Aldaber­geno­vanyń kóp eńbek sińirgenin atap aıtýǵa bolady. Súleımen MÁMET, «Egemen Qazaqstan»