Dımash taǵy da 3-oryn aldy

Dımash Qudaıbergen Qytaıda ótip jatqan «I am a singer» baıqaýynyń tórtinshi kezeńinde de úshinshi oryn ıelendi. Bul týraly QazAqparat habarlady. Birinshi oryndy «Sıao Szınten Shıszy» («Lion») toby alsa, ekinshi oryndy Lın Ilıan ıelendi. Úzdik úshtikti Dımash Qudaıbergen túıindedi. Tórtinshi – Dý Lısha, besinshi – Chjan Sze, altynshy – Tan Szın (úshinshi kezeńde birinshi oryn alǵan bolatyn) jáne jetinshi – Chjao Leı. «Weibo» áleýmettik jelisindegi Dımashtyń jumys tobynyń paraqshasynda baıqaýdyń 4-kezeńindegi sýretter jarııalandy. Buǵan deıin «Sınhýa» agenttigi baıqaýdyń 4-kezeńinde Dımashtyń qytaı tilindegi ándi aksentsiz oryndap bergenin habarlaǵan bolatyn. Málimetter boıynsha, «I am a singer» baıqaýynyń tórtinshi kezeńi 2 aqpan kúni jazylǵan edi. Ol telearnalardan 11 aqpan kúni Astana ýaqytymen saǵat 20:30-da kórsetiledi. Dımashtyń bul kezeń úshin tańdaǵan «Kúzgi muń» ánin 2013 jyly «I am a singer» baıqaýynda qytaılyq ánshi Sha Baolıan oryndaǵan bolatyn. Keshe qazaqstandyq jas talant ıesiniń anasy Svetlana Aıtbaeva onyń atalmysh baıqaý barysynda qazaq tilinde de án aıtatynyn jetkizdi. Aıta keteıik, Dımash jarystyń alǵashqy eki kezeńinde «SOS d’un terrien en détresse» jáne «Opera 2» ánderin oryndap birinshi oryn alǵan. Al úshinshi aınalymda «Show must go on» týyndysyn shyrqap, úshinshi orynǵa ıe bolǵan.