Berdiqulov báıgesi bel ala bastady

Sport jýrnalıstıkasyn qazaqtyń qa­byrǵaly qalamgeri Seıdahmet Berdi­qu­lovqa deıin de jazǵandar bolǵan, qazir de Seıdaǵań aıtatyndaı qosarǵa qos at alyp óndire jazyp júrgender az emes. Seıdaǵańnyń aldyńǵy býynnan óz­ge­sheligi – et pen teriniń arasyndaǵy jelikteı, qyzyqty taqyryp kezdeskende ǵana jazyp tastaǵan joq. Sport naqtylyqty súıedi dep tehnıkalyq nátıjelerge sú­ıe­nip qaradúrsindeý jazylyp kelgen qa­lypty buzyp, el kóz júgirtip qana ótetin oqıǵalardy kórkem ádebıet bıigine kó­tergendigi. Bir demmen oqylatyndyǵy. Oqıǵanyń ishine ózińdi de súńgitip alyp, janyńdy jadyratatyndyǵy. Dúnıeniń tórtkúl buryshyna joly túsken de ózi. Jeńil atletter tiziminen qazaq jastaryn izdep turǵanda “Jarqynym, kimdi izdep turǵanyńyzdy sezip turmyn. Olardy kelesi besjyldyqta da tappaısyz-aý dep qaýiptenemin”, dep aıarlyqpen jymıǵan jattyqtyrýshynyń qaraý nıetine qany­ńyz qaraısa, oǵan qaıtarǵan jaýabyna aıyzyńyz qanyp marhabattanyp qalasyz. Jaqsylyq Úshkempirovpen aralasty­ǵy­myz bar. Máskeý Olımpıadasynyń chem­pıo­ny bolǵanda “Shirkin-aı, meniń or­nym­da qazaqtyń nar tulǵaly jigiti bol­ǵanda, dúnıe júzi qazaqtar osyndaı halyq eken dep súısiner edi ǵoı”, dep keletin júrekjardy sózi ózimizdiń de qanymyzdy týlatqan. Jaqsylyq aǵamyz: “Aıttym ba, aıtpadym ba, áı, aıtsam aıtqan-aq shyǵarmyn esim shyǵyp tu­ryp”, deıdi. Aıtty-aıtpady esep emes. Seıdahmet Berdiqulovtyń atalǵan oqıǵa arqyly mıllıondaǵan jurttyń rýhyn kóterip, ultyn janyndaı súıýine yqpal etkendigi ǵoı. Sport jýrnalıstıkasyn qaradúrsin qal­pynan kórkem ádebıet bıigine kóter­gen, óz aldyna janr bolyp qalyptasýyna ólsheýsiz eń­bek sińirgen Seıdahmet Ber­diqulovty eske túsirýge ar­nalǵan jýrnalıster arasyn­da­ǵy spartakıada bıyl bi­rin­shi ret Ońtústik Qazaq­stan oblysynda jalaýyn kó­terdi. Spartakıada ústel ten­­nısi, doıby, shahmat, voleıbol jáne shaǵyn fýtboldan ótti. Oblys ákimdigi men oblystyq sport jáne týrızm basqarmasy jýrnalıster jarysynyń oıdaǵydaı ótýine barynsha jaǵdaı jasady. Spartakıadaǵa 8 oblystyń jýrnalısteri qatysty. Eki kúnge sozylǵan básekede komandalyq birinshi oryn men kýbokty Almaty obly­synyń jýrnalısteri jeńip aldy. Ońtústikte ataqty Atymtaı jomart­tyń inileri, saqy jigitter kóp. Qa­zaq­stannyń sport jýrnalısteri saıysqa túsip jatqanda “Kombı stroı” JShS-niń tóraǵasy, Ońtústik Qazaqstan oblystyq máslıhatynyń depýtaty Nuraly Ábishev shet qalmady. Ol báıgege tikken jeńil mashına Almaty oblysy jýr­­­nalısteriniń taqymynda ketti. Ekinshi, úshinshi oryndarǵa tıisinshe Ońtústik Qazaqstan oblysy men Jambyl obly­sy­nyń jýrnalısteri ıe boldy. Jarystyń jabylý salt­a­natynda bas tóreshi – Týrızm jáne sport mınıstrligi Ult­tyq shtattyq komandalar já­ne sport rezervi basshysy­nyń orynbasary Qazybek Imanǵalı jarysty uıym­das­tyrý men ótkizýge qosqan zor úlesi úshin Ońtústik Qazaqstan ob­ly­sy týrızm, deneshynyqtyrý jáne sport basqarmasynyń bastyǵy Bolat Qyryq­baev pen oblystyq “Ońtústik Qazaqstan” gazetiniń bas redaktory Beısenbaı Tá­jibaevty Seıdahmet Berdiqulov atyn­daǵy tósbelgimen marapattady. Almaty oblystyq týrızm, deneshynyqtyrý jáne sport basqarmasynyń bólim meńgerýshisi Almat Úshkempirovten jýrnalıster ala­manynda bas báıgege qalaı qol jetkizgen syryn suraǵanbyz. – Biz spartakıadaǵa jan-jaqty daı­yn­­daldyq, – deıdi Almat Úshkempirov. – Aldymen oblystaǵy barlyq memlekettik BAQ jáne jekemenshik gazetterdiń basyn qosyp, jarys ótkizdik. Sonyń ishinen úzdik shyqqandardy iriktep aldyq. Rasyn aıtsaq, úshtikti mejelep kelgenbiz. Qudaı jar bolyp, birinshi oryn aldyq. Muny óz basym, oblys jýrnalısteriniń tyńǵy­lyq­ty daıyndyǵy men aýyzbirshiligi jetkizdi dep oılaımyn. – Seıdahmet Berdiqulov aǵamyz ultyn súıgen uly tulǵa edi, – deıdi Ońtústik Qazaqstan oblysy týrızm, deneshy­nyq­ty­rý jáne sport basqarmasynyń bastyǵy Bolat Qyryqbaev. – Ulttyń namysyn ja­nıtyn qaıraǵy bolatyn. Ol kisiniń qa­lamynan týǵan kórkem dúnıeler óskeleń urpaqtyń rýhyn kóterdi, bıikke tal­pyn­dyrdy. Úlken sportta úlken jeńisterge jetken sportshylarymyzdyń jeńisinde qazaq balasyn Olımp bıiginen kórgisi keletin Seıdahmet Berdiqulov aǵamyzdyń úlken úlesi bar dep bilemin. Bul spar­takıdanyń Qazaqstanda orny bólek. Qazaqstan sportynda teńizdeı ter tógip, ultymyzdyń atyn asqaqtatýǵa úles qosyp júrgen aǵedil jigit osylaı deıdi. Jaqsylar bir-biriniń baǵasyn bilip júrse, bu qazaqtyń almaıtyn asýy joq qoı. Baqtııar TAIJAN, Ońtústik Qazaqstan oblysy.