Elordada "Máńgilik el" qaqpasynda kórme galereıasy ashylady

«Máńgilik El» qaqpasynda sholý alańy men kórme galereıasy ashylady. Panoramalyq dúrbimen jabdyqtalǵan sholý aýmaǵy monýmenttiń ústinde 21,5 metr bıiktikte jasalady. Sholý alańy 2017 jyldyń mamyr aıynan bastap esigin aıqara ashady, dep habarlaıdy qalalyq ákimdiktiń baspasóz qyzmeti. Erekshe qajettilikteri bar ekskýrsanttar úshin monýmenttiń ishinde lıft bar, biraq kelýshilerdiń basym bóligi sholý alańyna qalanyń qalyptasýy men tarıhy týraly aıtyp beretin kásipqoı gıdtarmen birge baspaldaqpen kóteriledi. Sonymen qatar, qalaǵa kórik beretin jańa oryn «Máńgilik El» qaqpasynyń tujyrymdamasyn ashatyn Qazaqstan tarıhy týraly jumystardy jáne taqyryptyq rolıkterdi translıasııalaý úshin mýltımedııalyq quraldarmen jabdyqtalady. Sholý alańyna baratyn jolda ornalasqan kórme zalynyń aýdany - 120 sharshy metr. Galereıa sheteldik jáne qazaqstandyq sýretshilerdiń, qolónershilerdiń jáne sándik-qoldanbaly óner sheberleriniń óner týyndylarynyń ekspozısııasy úshin qoldanylmaq, sondaı-aq, munda fotokórmeler ótkiziledi. Esterińizge sala ketsek, «Máńgilik El» arkasy QR Prezıdentiniń bastamasymen 2011 jyldyń 16 jeltoqsanynda Qazaqstan Respýblıkasynyń táýelsizdiginiń 20 jyldyǵyna oraı ashylǵan bolatyn.