Ýnıversıada kezinde birneshe deldal ustalǵan

Ýnıversıadanyń qaýipsizdigine jaýap beretin respýblıkalyq vedomstvoaralyq jedel shtab jumys qorytyndysyn jarııa etti. Bul týraly QazAqparat habarlady. Atalǵan shtabqa Ishki ister vıse-mınıstri, polısııa general-maıory Erlan Turǵymbaev jetekshilik etti. Qorytyndy jumysty jarııa etken Turǵymbaev Almaty jáne Almaty oblysy polısııasy Ýnıversıada kezinde qatań rejimde jumys atqarǵanyn aıtty. Sport sharalary ótken jáne sportshylar ornalasqan oryndarda qaýipsizdik barynsha kúsheıtilgenin jetkizgen vıse-mınıstr jalpy, qaýipsizdik sharasyna polısııa, Ulttyq ulan, Qorǵanys mınıstrligi qyzmetkerlerinen 7 myń 800 adam jumyldyrylǵanyn málimdedi. Sonymen qatar, bul sharaǵa IIM Almaty akademııasynyń 500 dáriskeri men 2 123 jeke kúzet qyzmetiniń kúzetshileri de tartylǵan. IIM málimetine súıensek, atqarylǵan jumystardyń nátıjesinde qańtar aıynda qylmystyq quqyq buzý 13,3 paıyzǵa, qoǵamdyq oryndarda 7,5 paıyzǵa, kóshedegi tártip buzý 33,5, sonyń ishinde aýyr jáne asa aýyr qylmystar 48 paıyzǵa azaıǵan. Urlyq 5,6 paıyzǵa tómendegen. Tártip buzý 14,3 paıyzǵa, alaıaqtyq 49,6 paıyzǵa tómendegen. Qalada jalpy, qylmys úrdisi 10,8 paıyzǵa azaıǵan. «Ýnıversıada barysynda 1 qylmystyq is, 13 ákimshilik quqyq buzý, 11 jeke zattaryn joǵaltý faktisi tirkeldi. Sonymen qatar, 11 adam bıletterdi alyp-satýmen aınalysqany úshin ustaldy. 2 adam belgilenbegen orynda saýda jasaǵany úshin ákimshilik jaýapkershilikke tartylyp, sport nysanynda ornalasqan dúkennen kúrte urlaǵany úshin 1 adam ustaldy. Ýnıversıada kezinde bıletterdi alyp-satý áreketteri oryn almas úshin IID tarapynan arnaıy top qurylyp, deldal adamdardan 500 bılet tárkilendi», – dedi Turǵymbaev. «Búgingi tańda barlyq saıystar aıaqtaldy. Ýnıversıada qatysýshylary qaıtyp jatyr. Almaty halyqaralyq áýejaıy men temirjol vokzalynda ketip jatqan sheteldik azamattardy tirkeý júıesi úzdiksiz jumys istep tur. Jalpy, stýdenttik oıyndar kezindegi qaýipsizdikpen qamtamasyz etý týraly IIM jáne arnaıy qyzmet, ózge de quqyq qorǵaý organdary tarapynan usynylǵan tujyrymdama tıimdi júzege asyryldy. Osy kúnderi BAQ-tan qaýipsizdik sharalary týraly 176 aqparat jaryq kórdi», – dedi respýblıkalyq vedomsvtoaralyq jedel shtab jumysyn qorytyndylaǵan Turǵymbaev.