26-bapqa engiziletin ózgeristerdiń jerge qatysy joq - sarapshy

Astanada Respýblıkalyq notarıattyq palatanyń uıymdastyrýymen  Qazaqstan Respýblıkasy Konstıtýsııasynyń 26-babyna arnalǵan dóńgelek ústel ótti. Oǵan Bas prokýratýra, Ádilet mınıstrligi, «Atameken» ulttyq kásipkerler palatasy, «Qazaqstandyq zańgerler odaǵy» Respýblıkalyq qoǵamdyq birlestiginiń ókilderi men ǵalymdar qatysty. Jıynda zańgerler konstıtýsııalyq reformany jan-jaqty saralap, óz oı-pikirlerin bildirdi. Onda mamandar sońǵy kezde halyq arasynda daý týǵyzǵan Ata zańymyzdyń 26-babyna ózgeristerdi engizýdi qoldaıtyndaryn, óıtkeni, halyqaralyq normalarǵa sáıkes, kez-kelgen eldiń azamaty shetelde menshik ıesi bolýǵa tolyq qaqysy bar ekenin aıtty. Mysaly, Qazaqstan Respýblıkasy Prezıdenti janyndaǵy Adam quqyqtary jónindegi komıssııanyń Sarapshylar keńesi tóraǵasynyń orynbasary Marat Bashırov búkil álemde shetel azamattary jer-júziniń qaı túkpirinde bolsyn múlikti jekeshendirile alatynyn, oǵan bizdiń otandastarymyzdyń da qaqy bar ekenin jetkizdi. –Jasyratyny joq, elimiz táýelsizdik alǵan kezde  osy másele Konstıtýsııaǵa jazylmaı qaldy. Qazir Ata zańymyzdyń 26-babyna ózgerister engizsek, Qazaqstanda turatyn barlyq adamdar ózi qalaǵan dúnıeniń bárin jekemenshikke alýyna bolady.  Alaıda, shetel azamattary jerdi eshqashan jekeshelendire almaıdy. Oǵan Jer kodeksi boıynsha qaqy joq. Jer tek Qazaqstan azamattaryna ǵana beriledi. Eger biz 26-bapqa ózgerister engizsek, sheteldikterge bıznesti damytýǵa, elimizge ınvestısııa tartýǵa múmkindik beretin edik. Sondyqtan men Konstıtýsııaǵa ózgerister engizýdi qoldaımyn, – dedi ol. Kezdesýde Respýblıkalyq notarıattyq palatanyń tóraıymy Ásel Janábilova, zańgerler Lıýdmıla Kýtenko men Oleg Polýmordvınov qoldanystaǵy Ata zańǵa ózgeristerdiń engizilýine esh qarsy emestigin, shetelderde aýyl sharýashylyǵyna arnalǵan jerlerdiń 40 paıyzdan astamy jekemenshikke beriletinin, al bizdiń elde jer satylmasa da basqa jyljymaıtyn múlikter men óndiris oryndary jekemenshikke berilse odan memleket tek qana paıda tabatynyn málimdedi. Dóńgelek ústelde mamandar menshik quqyǵynyń kepildigin odan ári nyǵaıtý úshin usynystaryn aıtyp,  jumys tobyna joldady. Dastan KENJALIN, «Egemen Qazaqstan»