Elimizde turaqty jumysqa 800 myń adam zárý

QR Eńbek jáne halyqty áleýmettik qorǵaý vıse-mınıstri Birjan Nurymbetov elimizde naqty qansha adam jumysqa zárý ekenin málimdedi, dep habarlaıdy QazAqparat. «Búginde bizde jumyssyzdyq deńgeıi 4,9 paıyzdy qurap tur. Eger álemdik aýqymda salystyrsaq, bul aıtarlyqtaı jaqsy nátıje. Biraq, adamdardyń kóbi bizdegi 4,9 degen kórsetkishke kúmánmen qaraıdy. Sebebi, olar naqty ómirdegi jaǵdaı basqasha degen pikirde. Degenmen, osy turǵyda ózindik shyndyq ta bar», – dedi Nurymbetov. Osy oraıda, ol resmı derekter boıynsha elimizde jumyssyzdar sany 445 myń adam ekenin atap ótti. «Budan bólek, 2,2 mln adam ózin-ózi jumyspen qamtyp otyr. Azamattardyń jeke kásipkerlikpen aınalysyp, ózin tabyspen qamtamasyz etkeni jaqsy. Alaıda, munda da birqatar problemalar bar», – dep túsindirdi vıse-mınıstr. Bul turǵyda Nurymbetov ózin-ózi jumyspen qamtylǵandar qurylymynda tek kúnkóris úshin ǵana talpynyp júrgender bar ekendigin aıta kele, olardyń tabysy mardymsyz ekendigin jetkizdi. Degenmen de, statıstıka organdarynda bul adamdar ózin-ózi jumyspen qamtyǵandar retinde tirkelip otyr. «Salyq organdarynda tirkelip, jeke qyzmetimen aınalysatyn adamdar bar. Olar salyq tóleıdi, zeınetaqylyq tólemderdi aýdarady. Biraq, esh jerde tirkelmegen, ózinshe jumyspen qamtylǵandar. Sonymen qatar, osy azamattardyń tabystary azǵantaı ǵana, keıde olardyń kiristeri múldem bolmaı jatatyn jaǵdaılar da kezdesedi. Osy oraıda, olardyń kópshiliginiń tabystary eń tómengi kúnkóris deńgeıinen aspaıtyndyǵyn aıta ketken jón. Statıstıkada bundaı adamdarǵa qatysty ónimsiz ózin-ózi jumyspen qamtyǵandar termıni qoldanylady. Osyndaı adamdar sany bizde 360 myńnan astam», – dep naqtylady Nurymbetov. Onyń sózine qaraǵanda, resmı túrde jumyssyz atanǵan 445 myń adamǵa atalǵan kórsetkishti qosqan kezde, elimizde jumysqa zárý nemese turaqty tabysqa muqtaj kem degende 800 myń adam baıqalady.