«Qoshqar men Tekege» teńge jete me?

Sońǵy jyldary ekranǵa shyqqan qazaq mýltfılmderiniń ishinde «Qoshqar men Teke» á degennen-aq kórermenderdiń ystyq yqylasyna ıe bolǵany anyq. Qashanda shetel mýltfılmine qumartyp, Shrek, О́rmekshi adam, Spandjbob dese ishken asyn jerge qoıatyn qazaq balalaryn lezde baýrap alyp, kishkentaılardyń qoshqar bop alysyp-julysyp júrgenine talaı kýá boldyq. Degenmen de qazaqy bolmysqa jaqyn, ásirese, jas kórermenderdi kúlkige bólep, kóptep jınaı bilgen «Qoshqar men Tekeniń» bar-joǵy eki-aq serııasy shyqty. Tipti, aýyz toltyryp aıtýdyń ózi uıat... Mundaı kezde shetel mýltfılmderi serıal-serıal bop túsirilip, sońy kórinbeı, ubap-shubap keter edi. Jap-jaqsy tabylǵan personajdardyń nebári eki-aq serııamen shektelip qalýyna ne sebep? – Shynynda «Qoshqar men Tekeni» jurt óte jaqsy qabyldady, – deıdi bizben áńgimesinde «Saq» kınostýdııasynyń rejısseri Batyrhan Dáýrenbekov. – Eńbegimiz baǵalanyp, bul mýlt­fılm Qytaıda arnaıy júldemen de marapattaldy. Elimizdegi osy salany saraptaýshy mamandar «Qoshqar men Tekeni» eń úzdik 5 mýltfılmniń biri retinde baǵalady. Aıtpaqshy, úzdik dep baǵalanǵan osy beseýdiń úsheýi bizdiń «Saq» kınostýdııasynyń ónimderi. Bul da bizdiń sapaly eńbegimizdiń aıqyn bir kórinisi bolsa kerek. «Qoshqar men Tekeniń» eki serııasy «Qazaqfılmniń» tapsyrysy boıynsha túsirildi. Qarjysyn sol mekeme tóledi. Qazir úshinshi serııasynyń ssenarııi jazylyp, daıyn tur. Bul serııa aldyńǵylardan da qyzyqty bolatynyna senimim mol. О́ıtkeni, qoshqar, teke, qasqyrlardan da bólek personajdar qosylǵan. Biraq, osy serııany túsirýge qarjy bolmaı tur. Ázirge demeýshilerge habarlasyp, usynys aıtqanymyz joq. Degenmen de bul iske qoldaý bolmasa, ssenarıı tartpada jatyp, óz mańyzyn joǵaltyp ala ma degen de qaýpimiz bar. Iá, elimizde mýltfılm óndirisiniń áli de aıaqqa tura almaı jatqany týraly talaı márte jazyldy. Áıtse de tapqyrlyǵy men sheberligi arqasynda jurtty moıyndatyp, ulttyń bitim-bolmysyn, tynys-tirshiligin ekran arqyly jarqyratyp júrgen bul ónerli ujymǵa Mádenıet jáne sport mınıstrligi tarapynan úlken qoldaý kerek sııaqty. Oralhan DÁÝIT, «Egemen Qazaqstan»