Jazýshy Tólen Ábdiktiń dramalyq-psıhologııalyq janrda jazylǵan «Oń qol» áńgimesi oqyrman qaýymdy qazaq ádebıetindegi jańashyldyǵymen selt etkizgen shyǵarma bolatyn. Qostanaılyq Jánibek Kárbozov ótken jyly T.Júrgenov atyndaǵy óner akademııasyn támamdarda osy shyǵarmany ekrandaýǵa bel býǵan eken. Sol eńbegin sátti aıaqtap shyǵyp, dıplom jumysyn qorǵaǵanda komıssııanyń jaqsy baǵasyn aldy ári bilim ordasyn úzdik bitirdi.
– Tólen Ábdik meniń atam Kákimjannyń týys inisi bolady. Kózimdi ashqaly úıde de, aýylda da Tólen atam týraly estip, onyń kitaptaryn bala kúnimizden oqyp óstik. Bala kezde «Oń qol» áńgimesinen «qorqatynbyz». Tólen atamnyń osy shyǵarmasynyń jelisimen fılm túsirýge avtordyń ózinen ruqsat suradym. Ol kisi qarsy emestigin aıtyp, batasyn berdi, bul armanyma qanat baılaǵandaı boldy, – deıdi jas rejısser Jánibek Kárbozov.
Jánibek fılmde áńgime mátinin sol kúıinshe alǵanymen, ol shyǵarmanyń ekrandyq nusqasyna eshqandaı nuqsan keltirmegen. Rejısser kóp izdenistermen ózindik sheshimder jasaýǵa talpynady. 30 mınýttyq qysqa metrajdy fılm kórermenin baýrap alady, oılandyrady. Jazýshy kúndelikti tirlikte kóz úırenbegen oǵashtaý oqıǵany áńgimeleı otyryp, oqyrmanyn Alma arqyly ómirge yntyqtyra túsedi. Rejısser de shyǵarma avtorynyń osy oıyn dóp basa bilgen.
– Ekrandaǵy «Oń qoldy» beıjaı tamashalaý múmkin emes. Úreı men úmit qos qanatyńa aınalyp, tylsym bir álemge sapar shekkendeı áserge enesiń. Bári shynaıy. Tólen Ábdik osy týyndysy arqyly oqyrmanyna oı álemindegi jaýapkershiligin sezdirse, Jánibek oǵan jastyqqa tán romantıka, rejısserlik sheshimin qosqan. Ol qyz ben jigit arasyndaǵy beıkúná epızodtardy sátti bere bilgen. Áńgimede Almanyń anasy aıtylsa, kınoda ákesi kórinis tabady. Dárigerdiń qolyndaǵy «Áke» kitaby da kezdeısoqtyq emes, tuspal tárizdi. Sol arqyly Almanyń ólimine kináli adamnyń sulbasy kórinetindeı, – deıdi kınonyń tusaýkeserin kórgennen keıin oı bólisken jýrnalıst, aqyn Abylaı Maýdanov.
Qazaq kınosyndaǵy dramalyq-psıhologııalyq janrdyń qarlyǵashy deýge laıyq «Oń qol» búgingi kúnniń kúıip turǵan taqyrybynyń biri – sýısıd máselesin tuspaldap qoıatyndaı. Alma nege óz qolynyń qurbany boldy? Álde jaqsylyq bar jerde jamandyq júretini, adam óz boıyndaǵy jaqsylyqtyń emes, jamandyqtyń qurbany bolatynyn aıtqysy keldi me? Kórermen oıy san-saqqa ketedi. Qaıtkende de rejısser jazýshynyń oıynan shyǵýǵa tyrysqan.
Fılmde dárigerdiń rólin Ǵ.Músirepov atyndaǵy jastar teatrynyń akteri Áset Esjan, Almanyń rólin T.Júrgenov atyndaǵy óner akademııasynyń 3-kýrs stýdenti Zýhra Saıpı oınaıdy. Ekeýi de shynaıylyǵymen kórermenin sendire bilgen. Almanyń ákesiniń rólin kórermenge Ermek Tursynovtyń «Shal» fılminen jaqsy tanys Erbolat Toǵyzaqov alyp shyqty. Fılmdi mýzykamen kompozıtor Ushqyn Jamalbek kórkemdedi. Aıtpaqshy, fılmdi kórgennen keıin Tólen aǵa jas rejısserdiń talabyna rızashylyǵyn bildiripti.
Al Jánibek Kárbozovtyń osyǵan deıin túsirgen qysqa metrajdy «Borandy túnde» jáne «Káýsarym» fılmderin kórermen jyly qabyldaǵan bolatyn.
Názıra JÁRIMBETOVA,
«Egemen Qazaqstan»
QOSTANAI
