Sýretshi Georgıı Sokov óziniń 41-shi ret ashylyp otyrǵan kórmesin «Aq pen qara» dep atapty. Shyǵarmalary tek grafıka janrynda oryndalǵan. «Men úshin qarama-qaıshy osy eki tústiń ózi kóp nárse aıtatyndaı kórinedi. Qazir tústiń alýan túrin paıdalanyp salatyn keskindeme janry suranysqa ıe ekenin bilemin. Biraq óner degen uly uǵymda shekteý bolmaýy tıis. Men «oıymdy nege grafıka janrymen aıtpaımyn?» dedi Georgıı Mıhaılovıch kórmeniń ashylý saltanatynda. Georgıı Mıhaılovıch Sokovtyń sózinshe, qazirgi kórmelerde grafıka sırek usynylady, óıtkeni kez kelgen zamanaýı sýretshi kúrdeli, ári kóp eńbekti qajet etetin naqysh tehnıkasynda jumys jasaýǵa bel býa bermeıdi. G. Sokovtyń grafıkalyq týyndylarynyń sıýjetterinde dala salt attylary, rysarlar, avtordy tolǵantatyn ádebı keıipkerler jıi kezdesedi. Sýretshi týyndylaryna joǵary oryndaý mádenıeti, baı qııal, mánerlilik, aq pen qara tústerdiń kereǵarlyǵy tán. Ol mysqylshyl, ashýly, syrshyl bola alady, oǵan turmystyń jáne ómirdiń asqaq tustaryna qol jetkizý ońaı.
Saltanatta oblystyq mádenıet basqarmasynyń basshysy Erlan Qalmaqov sýretshini kórmeniń ashylý saltanatymen quttyqtaı otyryp, óner adamdarynyń shyǵarmalarynda úndestik bolatynyn aıtty. Ol Muqaǵalı Maqataevtyń óleńin orys tilinde oqyp berdi. Sonymen qatar onyń shákirtteri, áriptesteri jáne sýretshiniń talantyn qurmetteıtin kórermender jyly lebizderin aıtty.
Názıra Járimbetova, «Egemen Qazaqstan»
