2017 jyly "QTJ" taza tabysyn 29 mlrd teńgege jetkizbek

«Qazaqstan temir joly» UK» aksıonerlik qoǵamynda QR Premer mınıstriniń birinshi orynbasary Asqar Mamınniń tóraǵalyǵymen dırektorlar keńesiniń otyrysy ótti, dep habarlaıdy ulttyq kompanııanyń baspasó qyzmeti. Otyrysta «QTJ» UK» AQ 2017-2021 jyldarǵa arnalǵan Damý jospary bekitildi. 2016 jyly «Qazaqstan temir joly» UK» AQ-nyń taza tabysy 28 mlrd. teńgeni qurasa, kompanııanyń tasymaldaý men basqa da túrlerinen kirisi 2016 jyly 90 mlrd. teńge bolǵan. Kompanııanyń 2017-2021 jyldarǵa arnalǵan damý josparynda bıylǵy 2017 jyly taza tabysty 29 mlrd. teńgege jetkizý kózdeldi. Al, tasymaldaý men basqa da qyzmetterden túsetin kirisin 2017 jyly 127 mlrd. teńgege jetkizý josparlanyp otyr. 2017 jyly kompanııanyń jalpy júk aınalymyn 188,7 mlrd. tonna-shaqyrymǵa jetkizý josparlanyp otyr. 2016 jyly jolaýshylar aınalymy 18057 mln. jolaýshy-km qurady. 2017 jyly jańa baǵdarlardyń iske qosylýyna oraı, onyń ishinde EKSPO halyqaralyq kórmesi qarsańynda jolaýshylar aınalymy burynǵydan arta túsedi dep kútilýde. 2017 jyly QHR-EO elderine tranzıttik konteınerlik tasymaldaý kólemi 230 myń JFE (jıyrma fýttyq ekvıvalent) qurap, 2016 jylǵy kórsetkishten 2,2 esege artatyn bolady.