QR Ákimshilik kodeksi izgilendiriletin boldy

Qazaqstanda Ákimshilik kodeks izgilendiriledi. Bul týraly búgin QR Ádilet mınıstrliginiń keńeıtilgen alqa májilisinde vedomstvo basshysy Marat Beketaev málimdedi, dep jazady QazAqparat. Onyń aıtýynsha, qazirgi ýaqytta mınıstrlik memlekettik múddeli organdarmen, úkimettik emes uıymdarmen, «Atameken» ulttyq kásipkerler palatasymen birge «Qazaqstan Respýblıkasynyń ákimshilik quqyq buzýshylyqtar týraly kodeksine ózgerister men tolyqtyrýlar engizý týraly» Zań jobasyn ázirlegen. «Atalǵan zań jobasynda ákimshilik quqyq buzýshylyqtyń 150-den asa quramy boıynsha aıyppul sanksııasynyń mólsherin azaıtý, sanksııasy eskertý túrindegi ákimshilik jazany kózdeıtin baptardy kóbeıtý, jeńildetetin mán-jaǵdaı anyqtalǵan kezde sotqa, organǵa laýazymdy jáne zańdy tulǵalarǵa qatysty ákimshilik aıyppuldyń somasyn 30 paıyzǵa deıin qysqartýǵa múmkindik beretin normalardy qoldaný, toqtata turýǵa negiz bolyp tabylatyn buzýshylyqtardy joıǵan kezde ruqsat berý is-áreketin merziminen buryn qaıta jańǵyrtý tártibin reglamentteý usynylǵan», - dedi Beketaev. Sonymen qatar Beketaevtyń atap ótýinshe, Ádilet mınıstrligi QR Prezıdentiniń memlekettik qyzmet kórsetý prosesterin ońtaılandyrý jónindegi tapsyrmasyn josparly túrde oryndaýda.