Qazaqstanda ákimshilik aıyppuldardyń somasy azaıýy múmkin

Ádilet mınıstrligi ákimshilik aıyppuldardyń somasyn azaıtýǵa arnalǵan zań jobasyn jasady. Bul týraly búgin QR Ádilet mınıstrliginiń keńeıtilgen alqa májilisinde vedomstvo basshysy Marat Beketaev málimdedi. "Mınıstrlik múddeli memlekettik organdardyń qyzmetkerlerimen jáne "Atameken" Ulttyq kásipkerler palatasymen birige otyryp, "QR Ákimshilik quqyq buzýshylyq týraly kodeksine ózgertýler men tolyqtyrýlar engizý týraly" zańnyń jobasyn jasady. Osy zańnamaǵa sáıkes, ákimshilik aıyppuldardyń kólemin qysqartý, sondaı-aq, eskertý túrinde jasalǵan ákimshilik jazalardyń baptaryn kóbeıtý usynylady", - dedi Ádilet mınıstri Marat Beketaev alqa otyrysy barysynda. Ádilet mınıstriniń aıtýynsha, jazany jeńildetetin jaǵdaılar bolǵanda salynatyn ákimshilik aıyppuldyń somasyn jalpy somadan 30 paıyzǵa deıin azaıtý usynylady.