Astanada Memleket basshysynyń Joldaýy talqylandy

Ortalyq kommýnıkasııalar qyzmetinde Memleket basshysy Nursultan Nazarbaevtyń Qazaqstan halqyna Joldaýyna arnalǵan baspasóz máslıhaty ótti. Oǵan «Nur Otan» partııasy janyndaǵy «Jas Otan» jastar qanatynyń tóraǵasy Danııar Súndetbaev, «Qazaqstan jastary kongresi» ZTB Atqarýshy dırektorynyń resmı ókili Álisher Tursyn men Qazaqstan stýdentteri alıansynyń kóshbasshysy  Merjan Ábilhas qatysty. Brıfıngte D.Súndetbaev Elbasynyń Qazaqstan halqyna Joldaýyndaǵy tapsyrmalardy iske asyrý úshin elimizdiń barlyq óńirlerinde tıisti jumystardyń jasalyp jatqanyn, «Jas Otannyń» aımaqtyq fılıaldarynyń uıymdastyrýymen «Erkin pikir» alańy men «Urpaqtar sabaqtastyǵy» jobasy aıasynda 48 kezdesý ótkizilgenin atap ótti. Sonymen birge, ol elimizdiń 14 oblys ortalyqtary men Astana jáne Almaty qalalarynda ornalasqan bazarlarda memlekettik organdar men máslıhat depýtattarynyń qatysýymen 36 qabyldaý sharasy bolǵanyn, 124 kezdesý ótkizilip, oǵan jalpy sany 18 myńnan astam adam qatysqanyn aıtty. «Joldaýda Memleket basshysy Úkimetke «Sıfrlyq Qazaqstan» baǵdarlamasyn daıyndaýdy tapsyrdy.  Bul baǵdarlama qoǵamnyń barlyq salasyna qan júgirtip, jyldam ári tıimdi jumys isteýge septigin tıgizedi. Osyǵan baılanysty jastar Elbasynyń Qazaqstan halqyna Joldaýyn qoldap, jańa múmkindikterdi talqylaýda. Sebebi, onda jastar úshin jaǵymdy jańalyqtar kóp. Mysaly, jańa aıtqan «Sıfrly Qazaqstan» baǵdarlamasynyń ózi elimiz úshin úlken jumys. Sondaı-aq, bıylǵy jyldan bastap jumyssyz júrgen jastardy qoldaýǵa arnalǵan «Barshaǵa arnalǵan tegin kásiptik-tehnıkalyq bilim berý» jobasy jasalady.  Bul bamtama da der kezinde jasalyp otyr. Joldaýda Prezıdent bilimdi jastardy tárbıeleýge erekshe kóńil bólinetinin, úsh tuǵyrly til saıasatynyń jalǵasatynyn da aıtty, – dedi ol. Kezdesýde  «Jas Otan» jastar qanatynyń tóraǵasy jastar úshin taǵy bir mańyzdy máseleni atap ótti. Ol oqýǵa túse almaǵan talapkerlerdi qoldaýǵa arnalǵan sharalar týraly aıtty. «Qazirgi kezde biz «Sátti qadam» jobasyn jasap jatyrmyz. Bul jobaǵa oqýǵa túse almaǵan jastardyń 50 paıyzy qatysa alady», – dedi D.Súndetbaev. Sol sııaqty ol aldaǵy kezde qala men aýyl jastaryna bilim berý aıyrmashylyǵyn azaıtý jumystarynyń da jasalatynyn jetkizdi.  Al Álisher Tursyn óz sózinde Elbasynyń Qazaqstan halqyna Joldaýy «Máńgilik el» biryńǵaı ulttyq ıdeıasyndaǵy orasan zor jetistik ekendigin atap ótti. Ol qazirgi kún saıyn ózgerip jatqan jer-júzinde tehnologııanyń qarqyndy damyp jatqanyn, degenmen  elimizdiń aldynda jańa syn-qaterlerdiń turǵandyǵyn atap kórsetti. «Prezıdent Nursultan Nazarbaevtyń Qazaqstan halqyna Joldaýynda qoıǵan mindetter osy syn-qaterlerge jaýap berildi. Biz Memleket basshysynyń ustanǵan saıasatyn qoldaımyz. Elbasy belgilegen bes basymdyqtardy iske asyrý, elimizdi álemniń aldyńǵy qatarly damyǵan 30 eliniń qataryna qosylýyna múmkindik beredi», – dedi ol. Kezdesýde Qazaqstan stýdentteri alıansynyń kóshbasshysy  Merjan Ábilhas ta Joldaýdaǵy baǵyttardy tolyqtaı qoldaıtyndaryn, sebebi elimiz Táýelsizdik alǵan kezden beri stýdent jastar álemde teńdesi joq «Bolashaq» jáne basqa da baǵdarlamalarmen  shet elde  bilim alýǵa múmkindik alǵanyn málimdedi. «Bul tek Elbasymyzdyń qoldaýymen iske asqan baǵdarlamalardyń azǵantaı ǵana bóligi. Qazir olar óz jemisin berip keledi», – dedi Merjan Ábilhas. Dastan KENJALIN, «Egemen Qazaqstan»