Soltústik Qazaqstan oblysyna «Nur Otan» partııasy Tóraǵasynyń Birinshi orynbasary Muhtar Qul-Muhammed keldi. Muhtar Qul-Muhammed oblys ákimi Erik Sultanovpen birge óńirdegi eńbek ujymdarymen birqatar kezdesýler ótkizdi, sondaı-aq partııa aktıviniń aldynda jasalatyn jumystardyń basym baǵyttaryn belgilep berdi. Bul týraly oblys ákimdiginiń baspasóz qyzmeti habarlady.
«Nur Otan» partııasy Tóraǵasynyń Birinshi orynbasary eń aldymen Qyzyljar aýdanyndaǵy «Radýga» seriktestigine bardy.
Kásiporynda qazir 4 seh jumys istep tur. О́ndiris oshaǵy plastmassadan shelek, legen, sebet pen túrli ydys-aıaqtardy jasaıdy. Jalpy ónimniń 280-nen astam túri óndiriledi. Kásiporynnyń aılyq tabysy 80 mln teńgeniń mańaıynda. Jalpy, Elbasy Joldaýyndaǵy básekege qabiletti eksporttyq óndiristi damytýdy kózdeıtin ındýstrııalandyrý munda jaqsy jolǵa qoıylǵan.
«Aýdan ortalyǵyndaǵy shaǵyn kásiporynda 200-ge jýyq ónim shyǵarylady. Jáne ol Qazaqstanda ǵana emes, kórshiles Reseıge de saýdalanady. Básekege qabilettilik degen osy. Eger úlken kásiporyndar da dál osyndaı jaqsy tehnologııalyq deńgeıde damıtyn bolsa, olar jahandyq jumysty erkin meńgere alatyn bolady. Elbasy joldaýynyń basty maqsaty da osy», – dedi Muhtar Qul-Muhammed
Budan soń Muhtar Qul-Muhammed «Radýga» seriktestiginiń Petropavl qalasynda ornalasqan sehtarynda boldy. Munda kásiporyn qurǵaq tańǵy astar, júgeri taıaqshalary syndy ónimderdi óndiredi.
«Nur Otan» partııasy Tóraǵasynyń Birinshi orynbasary Muhtar Qul-Muhammedke kásiporyn basshysy Dmıtrıı Sharapaev sehta qandaı tyń qondyrǵylardyń jumys istep turǵandyǵyn baıandady. Bul kásiporyn ozyq elderdiń tehnologııasyn paıdalanady.
«Kásiporyn árdaıym jańǵyrtýdan ótip turady. Qazirgi tańda taýar tapshylyǵy joq. Elbasy óz Joldaýynda damýdyń barlyǵy ınnovasııa dep durys aıtty. Sebebi, tyń tehnologııalar men qondyrǵylar bolmasa naryqtan oryn tabylmaıdy. О́nimińdi de eshkim almaıdy. Búginde bizde ıtalııalyq, ıspanııalyq jáne qytaılyq qurylǵylar ornatylǵan. Taýardyń 50-den astam túri óndiriledi», – dedi Dmıtrıı Sharapaev.
Keıin delegattar «Bogatyrskıı prodýkt» JShS-ne bardy. Bul jerde táýligine 400 tonna taýar shyǵarylady. Sonymen qatar, zaýyttyń un óndiretin dıirmeni de bar. Áli tolyq qýatyna kóshe qoımaǵan keshen búginniń ózinde kúnine 150 tonna taýar shyǵarýǵa qaýqarly.
«Elbasy Joldaýyna sáıkes biz óndiristi jańǵyrtýdyń 3-kezeńine kóshtik. Búginde dıirmen kesheni 90 paıyzǵa daıyn. Aldaǵy ýaqytta biz bıdaı saqtaýǵa arnalǵan qosymsha syıymdylyqtardy, un, makaron syndy daıyn ónimderdi saqtaıtyn qoıma salýdy josparlap otyrmyz. Taýardy tek el aýmaǵynda ǵana emes, sonymen qatar Reseı, Aýǵanstan, О́zbekstan memleketterine eksporttaımyz», – dedi kásiporyn dırektory Anatolıı Lýkashov.
Keshen ishin aralap, qondyrǵylarmen jiti tanysqan Muhtar Qul-Muhammed Elbasy aıtqandaı agrarlyq sektor ekonomıkanyń jańa draıverine aınalýy kerek ekendigin atap ótti.
Jańǵyrtýdyń alǵashqy kezeńinde kásiporyndar endi ǵana ashylsa, 2-kezeńinde olar jańa qural-jabdyqtar satyp alyp, óndiris kólemin ulǵaıtty. Endi 3-kezeńde tehnologııalyq modernızasııa júrip jatyr», — dedi Muhtar Qul-Muhammed.
Muhtar Qul-Muhammedtiń sońǵy aıaldaǵan nysany – «ZIKSTO» AQ. О́tken jyly kásiporyn quny 6 mlrd teńgeden asatyn taýar shyǵarsa, bıyl bul kórsetkishti 17,5 mlrd teńgege jetkizý kózdelýde. Jalpy, jyl sońyna deıin munda 1500 vagon jasaýdy josparlap otyr.
