Berdimuhamedov Túrkimenstan prezıdenttigi úshin saılaýda daýys berdi

Túrkimenstan prezıdenttigine kandıdat, eldiń qazirgi basshysy Gýrbangýly Berdimuhamedov otbasymen birge jeksenbi kúni tańerteń prezıdenttik saılaýda daýys berdi. Bul týraly túrkimen telearnalaryna silteme jasap RIA «Novostı» habarlady. Ashgabattaǵy №68 mektepte ornalasqan saılaý ýchaskesine prezıdentpen birge onyń áke-sheshesi keldi. Daýys berýden keıin Berdimuhamedov qysqasha sóz sóıledi. «Búkil halqymyz el úshin mańyzdy oqıǵaǵa qatysýda. Mıllıondaǵan adam konstıtýsııalyq huqyn paıdalanyp, erikterin bildirip jatyr. Olar bolashaq aldyndaǵy uly jaýapkershiligin sezinip, joǵary memlekettik qyzmetke aldaǵy jeti jylǵa laıyqty degen kandıdatqa daýys berýde» dedi ol. Saılaýǵa barlyǵy toǵyz kandıdat tústi. Jergilikti ýaqyt boıynsha 07.00-de (Astana ýaqyty boıynsha 08.00) bastalǵan daýys berý keshki 19.00-ge deıin jalǵasady. Daýys berýge qatysqan saılaýshylardyń jartysynan kóbiniń qoldaýyna ıe bolǵan kandıdat Túrkimenstannyń jańa saılanǵan prezıdenti bolyp sanalady. 2016 jyldyń 14 qyrkúıeginde qabyldanǵan jańa Konstıtýsııaǵa sáıkes, prezıdent ókilettigi bes jyldan jeti jylǵa uzartyldy. Sonymen qatar,prezıdenttiń jasy 70-ten joǵary bolmaýy kerek degen shekteý alynyp tastaldy.