Túrkimenstanda saılaýshylardyń 74 paıyzy daýys berdi

  Túrkimenstanda saǵat 13:00 kezindegi jaǵdaı boıynsha prezıdent saılaýyna qatysýshylardyń 74%-y (2 mıllıon 406 myń 253 adam) daýys berdi. Bul týraly RIA «Novostı» aqparat agenttigi habarlady. Daýys berý jergilikti ýaqyt boıynsha saǵat 07:00 (08:00 Ast.) kezinde bastalyp, 19:00-ge deıin jalǵasady. Saǵat 09:00 kezindegi jaǵdaı boıynsha saılaýǵa 25,5 paıyz adam qatyssa, 11:00-de bul kórsetkish 51 paıyzdy (1 mıllıon 661 myń 342 adam) qurady. Saılaýǵa Túrkimenstannyń qazirgi prezıdenti Gýrbanoǵly Berdimuhammedov te qatysty. Sondaı-aq, onyń ata-anasy Malıkoǵly jáne Oǵýlabat Berdimuhammedovter, sondaı-aq, uly men nemeresi Ashhabad qalasyndaǵy Annanııaz Artyq atyndaǵy №68 mekteptegi saılaý ýchaskesinde daýys berdi. «Búgin halqymyz úshin mańyzdy kún. Mıllıondaǵan adam konstıtýsııalyq quqyǵyn paıdalana otyryp, aldaǵy jeti jylda Túrkimenstanǵa laıyqty basshy bolatyn tulǵaǵa daýys berip jatyr», - dedi Berdimuhammedov. Jergilikti BAQ ókilderi ózge de kandıdattardyń saılaýǵa qatysqanyn habarlady. Aıta keteıik, Túrkimenstannyń 2016 jyly 14 qyrkúıekte qabyldanǵan konstıtýsııasy boıynsha prezıdenttik qyzmet ýaqyty bes jyldan jeti jylǵa sozylǵan. Sonymen qatar, burynǵydaı 70 jastan joǵary bolmaýy kerek degen shekteý alynyp tastalǵan bolatyn.