IDM Fılıppındegi qazaqstandyq týrısterge saq bolýdy eskertti

QR IDM týrızm ındýstrııasy departamenti Fılıppındegi jer silkinisine baılanysty qazaqstandyq týrısterge qaýipsizdik talaptaryn saqtaýǵa keńes berdi. Bul týraly baq.kz habarlady. «QR Investısııalar jáne damý mınıstrligi týrızm ındýstrııasy departamentine zardap shekken qazaqstandyq týrıster týraly aqparat, sondaı-aq týroperatorlardan shtattan tys jaǵdaılar týraly habarlamalar kelip túsken joq. Qazirgi tańda Fılıppın aýmaǵynda Qazaqstannan barǵan týrıster kóp emes. QR IDM týrızm ındýstrııasy departamenti QR SIM-men baılanysta jáne jaǵdaıdy baqylap otyr», - dep jazdy Týrızm ındýstrııasy departamentiniń basshysy M.Iǵalı. Departament Fılıppınde júrgen qazaqstandyqtarǵa jergilikti bıliktiń nusqaýyn oryndap, qaýipsizdik talaptaryn saqtaýǵa keńes beredi. Aıta keteıik, 11 aqpan kúni túnde Fılıppınniń ońtústiginde magnıtýdasy 6,7 baldyq jer silkinisi boldy. Saldarynan, 120-dan astam adam jaralanǵan, qaza tapqandar bar. Aldyn ala málimetterge súıensek, zilzaladan Sýrıgao qalasynda birneshe ǵımarattar qıraǵan. Turǵyn úıler men áýejaıǵa zııan kelip, jaryqsyz qaldy. Sýnamı qaýpi týraly aqparat taraǵan joq.