Erteń AQSh-taǵy joıqyn qasiretke 10 jyl tolady. 2001 jyldyń 11 qyrkúıegi adamzat tarıhynda buryn-sońdy bolyp kórmegen surapyl terakt retinde este qalatyny anyq. Lańkester Nıý-Iorktegi aspanmen talasqan Búkilálemdik saýda ortalyǵynyń «egiz» ǵımaraty men Pentagonnyń bir búıirin jermen jeksen etti.
Jospar boıynsha, tórtinshi ushaq AQSh parlamentiniń kúl-talqanyn shyǵarýy tıis bolatyn. Áýe kemesiniń bortyndaǵy jolaýshylar adam keıpindegi haıýandardyń bul áreketine jol bermeı, ushaq eldi mekensiz ashyq dalaǵa qulaǵan edi. Myńdaǵan jazyqsyz adam qurban boldy. Endi mundaı taǵylyq eshqashan, esh jerde qaıtalanbasyn deıik.
«Barbarossa» josparyn oryndaýǵa kiristi
Túriktiń áskerı komandovanıesi «Barbarossa operasııasy – Egeı qalqany» dep atalatyn jańa áskerı-teńiz strategııasyn jasady. Atalǵan strategııa sheńberinde túrikter flotynyń bir bóligin Qara jáne Mármár teńizderinen alyp, olardy Jerorta teńiziniń shyǵys jaǵyna baǵyttaıdy.
Atap aıtqanda, Ankara aıtarlyqtaı kúshin Kıpr men Izraıl jaǵalaýlaryna jınamaq. Kúsheıtilgen topty áýeden sol mańdaǵy avıabazada ornalasqan áskerı ushaqtar qorǵaıtyn bolady. Sondaı-aq túriktiń áskerı korablderi Adrıatıka jáne Qyzyl teńizderde turaqty áskerı kezekshilik atqaratyn bolady. Bul ózgerister Túrkııa men Izraıl arasyndaǵy kıkiljińge baılanysty oryn alyp otyrǵany da kúmánsiz.
Jumyssyzdyqpen kúres josparyn usyndy
AQSh prezıdenti Barak Obama óziniń ákimshiligi jasaǵan ekonomıkany yntalandyrý josparyn usyndy. Atalǵan qujatqa sáıkes, jumyssyzdyqpen kúreske 447 mıllıard dollar jumsaý josparlanypty. Qurama Shtattardaǵy saılaýǵa áli bir jyldan astam ýaqyt qalǵanymen, bul jospar B.Obamanyń kóziri bolatyn syńaıy baıqalady.
Aq úı qojaıynynyń jospary jańa jumys oryndaryn quryp, eńbekaqyǵa salyqty tómendetýdi kózdeıdi. Muǵalimder, jedel qyzmet túrlerinde isteıtinderdi qysqartpaý úshin 35 mıllıard dollar shyǵyndaý belgilenipti. 50 mıllıard dollar alty mıllıon jumyssyz úshin járdemaqy tóleýge jumsalmaq. Jospar boıynsha, memlekettik mektepterdi jańǵyrtyp, ınfraqurylymdaryn damytýǵa, temir jol, kópirler, áýejaılar qurylysyna da aıtarlyqtaı qarjy qarastyrylǵan.
Áýe keńistigin buzdy dep aıyptady
Reseıdiń úsh áskerı tikushaǵy Grýzııanyń áýe keńistiginen zańsyz ótip ketken. Muny Grýzııa syrtqy ister mınıstrligine silteme jasaı otyryp, «Interfaks» agenttigi habarlady. Tikushaqtar Grýzııa aýmaǵyna úsh shaqyrymdaı enip, áýe keńistiginde 15 mınótteı bolǵan.
Bul árekettiń Grýzııa tarapyn arandatý úshin jasalǵany anyq. Biraq Tbılısı soǵysty qaıta jandandyrmaý qaǵıdatyna beriktik tanytty, delingen Grýzııa SIM-iniń málimdemesinde. Syrtqy saıasat vedomstvosy sondaı-aq halyqaralyq qoǵamdastyqty Reseıdiń is-áreketine nazar aýdarýǵa shaqyrǵan. Reseı jaǵy bul aqparatty teriske shyǵaryp otyr.
Prezıdenttiń otbasy kúzetsiz qalady
Qyrǵyzstan parlamenti respýblıka prezıdentiniń otbasy múshelerin kúzetpen qamtamasyz etý týraly zań jobasyn qabyldaýdan bas tartty. Depýtattar prezıdenttiń jaqyndaryna kúzet qajet emes dep esepteıdi.
Parlament spıkeri Ahmatbek Keldıbekovtiń aıtýynsha, burynǵy rejimderde memleket basshysynyń týysqandary emin-erkin ómir súrdi. Kúzetiniń myqty bolǵany sonshalyq, olar prezıdent sııaqty júrdi. Bul jerde ótpeli kezeń prezıdenti Roza Otýnbaevanyń pikiri ózgeshe: el basshysy otbasynyń qaýipsizdigi el qaýipsizdigine tikeleı baılanysty, deıdi ol.
Mysyr vıza rejimin qatańdatty
Egıpet jaqyn arada kóptegen elderge qatysty vıza rejimin qatańdatpaq nıetinde. Endi Egıpetke enetin adamdar aldyn ala vıza alýlary tıis. Joldamany týr-operatorlar arqyly resimdegen týrısterge bul ózgeristerdiń qatysy joq.
Mysyr basshylyǵy mundaı qadamǵa qaýipsizdik sharalaryna baılanysty baryp otyrǵan sııaqty. Al munyń týrısterge qatysy joqtyǵyn túsinýge de bolady. О́ıtkeni, týrızm Egıpettiń eń basty kiris kózderiniń biri bolyp tabylady. Máselen, tártipsizdikter oryn almaǵan 2010 jyly Mysyr týrızmnen 13 mıllıard dollar kiris kirgizgen.
Qysqa qaıyryp aıtqanda:
*2011 jyly jer silkinisinen saqtandyrylǵan shyǵyn rekordtyq kórsetkishke jetip, 70 mıllıard dollardy qurady. Munyń ishindegi eń zardaptysy Japonııadaǵy jer silkinisi týyndatqan sýnamı bolyp tabylady. *NATO-nyń Aýǵanstandaǵy áskerı kontıngenti ózderiniń quramyndaǵy soldattyń VVS korporasııasynda jumys isteıtin jergilikti jýrnalısti óltirgenin moıyndady. NATO ókiliniń aıtýynsha, áskerı qyzmetshi jýrnalıst Ahmed Omed Hpýlvakti qarýly jasaq dep shatastyrypty. *Bolıvııada eki qozǵaltqyshty shaǵyn ushaq apatqa ushyrap, oqıǵa saldarynan 9 adam opat boldy. Qutqarýshylardyń sózine qaraǵanda, ushaqtyń qańqasy tolyq qıraǵan jáne eshkim tiri qalmaǵan. Apat sebebi belgisiz. *AQSh prezıdenti B.Obama qatty sý tasqynyna baılanysty Pensılvanııa jáne Nıý-Iork shtattarynda tótenshe jaǵdaı jarııalady. Atalǵan shtattardan 100 myńnan astam adam qaýipsiz jerlerge kóshirilgen. 5 adam opat bolǵan degen málimet bar. Internet materıaldary negizinde ázirlendi.
