«Elordamyzdyń ósip-órkendeýimen birge úlken ádebı orta qalyptasty. Qanshama aqyn-jazýshylar, shyǵarmashylyq adamdary Astanaǵa kóship kelip jatyr. Degenmen de, qazirgi zamanda ádebıetke de qorǵaýshy kerek bolyp tur. Mine, «Ádebıet portaly» ınternet-jobasy sol qundylyqtarymyzdy, ádebıetimizdiń asyl muralaryn nasıhattasa degen oıym bar», deıdi qoǵam qaıratkeri Myrzataı Joldasbekov ádebı portaldy tanystyrý rásiminde.
Iá, shynynda, Aqparat jáne kommýnıkasııalar mınıstrligine qarasty «Qazkontent» AQ «Ádebıet portaly» – zamanýı aqparattyq tehnologııalar jetistigin paıdalana otyryp, qazaq ádebıetin nasıhattaý, oqyrmandar men qalamgerler arasyndaǵy ádebı baılanysty jandandyrý, túrli shyǵarmashylyq is-sharalardy uıymdastyrýdy júzege asyryp otyrǵan Ortalyq Azııa keńistigindegi tuńǵysh ǵalamtorlyq biregeı ádebı joba.
– Ádebıettiń máni úlken, – deıdi belgili jazýshy Tólen Ábdik. – Adamgershiliksiz ómir súrýge bolmaıdy. Boıynda ondaı qasıet bolmaǵan adam ańǵa aınalady. Al ol bilimdi bolsa, tipten qaýipti. Adamgershilik qasıet eń aldymen otbasyndaǵy tárbıe, sosyn ádebıet arqyly beriledi. Sondyqtan, ádebıetti, kitap oqýdy barynsha nasıhattaý kerek. «Ádebıet portaly» – qazirgi tehnologııanyń damyǵan kezeńinde osy iske jańasha serpin beredi degen senimdemin.
Iá, portal otandyq rýhanı ónimderdiń sıfrly formattaǵy bazasyn qurý, qazaq, orys jáne ózge tilde jazatyn qazaqstandyq qalamgerlerdiń shyǵarmashylyǵyn nasıhattaý, jalpy, ádebı úderisti jandandyrý arqyly qoǵamda bıik talǵamnyń, memleketshildik oı-sananyń qalyptasýyna ıgi yqpal etýdi kózdeıdi.
– Bul ádebı portaldyń múmkindigi óte kóp, – dedi Aqparat jáne kommýnıkasııalar mınıstri Dáýren Abaev. – Tehnologııanyń sońǵy múmkindikterin paıdalana otyryp, tek jazba túrinde ǵana emes, oqyrmandarǵa aýdıo, beınejazbalar arqyly da qyzmet etedi. Eldiń rýhanııatyn damytýǵa atsalysyp jatqan mundaı portaldarǵa memleket tarapynan úlken qoldaý kórsetilýde.
Is-sharada sondaı-aq, aqyndar Qalqaman Sarın, Qanat Omarov, Janat Áskerbekqyzy jáne basqa da shyǵarmashylyq ókilderi óz oılaryn bildirip, tuńǵysh ǵalamtorlyq ádebı jobaǵa sáttilik tiledi. Minbege shyqqandardyń barlyǵynyń sóz sońynda ózine unaıtyn bir óleńdi oqyp berýi bul sharanyń basty ereksheligi bolǵany anyq. Bul kúni mınıstr de, ǵalym da, jazýshy da jyrdan shashý shashty. Internet jobanyń jetekshisi Baýyrjan Qaraǵyzulynyń aıtýyna qaraǵanda, dál qazir ádebı portal qorynda 5 myńǵa jýyq
elektrondy kitap bar eken. Jáne taǵy bir aıtary, bul portalǵa kez kelgen aqyn-jazýshy óz eńbekterin salyp, áleýmettik jeli retinde paıdalanyp, óz oqyrmandarymen baılanysa alady. Aldaǵy ýaqytta qazaqstandyq jáne sheteldik úzdik aqyn-jazýshylardyń shyǵarmalary men suhbattary jıi berilip turmaq.
Oralhan DÁÝIT,
«Egemen Qazaqstan»
ASTANA
