Reseılikter bizdiń tájirıbemizge súıenedi

On kún boıy álem nazaryn aýdarǵan XXVIII Dúnıejúzilik qysqy Ýnıversıada óz máresine jetti. Kelesi aq Ýnıversıada 2019 jyly Reseıdiń Krasnoıarsk qalasynda jalaýyn kótermek. Kelesi stýdentter saıysyna jaýapty reseılikter Almatyda ótken dodanyń uıymdastyrý jumystary men ótý barysyna óte jaqsy degen baǵa berdi. Ýnıversıada kezindegi qaladaǵy tártip pen qaýipsizdik sharalarynyń jaqsy uıymdastyrylýy, tamaq­tandyrý júıesiniń sapasy, eriktiler qaýymynyń belsendiligi syndy birqatar sharalar qonaqtar nazaryn aýdardy. Bul týrasynda Ýnıver­sıada-2017 dıreksııasynyń jetekshisi Naıl Nurov bylaı dedi: «Atalǵan sharany ótkizý barysynda qashyqtyqtan basqarý ádisi qoldanyldy. Mundaı ádis tek iri is-sharalarda ǵana qolda­nylady. Bul úshin Qazaqstan Respýblıkasy Prezıdenti kúzetiniń qyzmetkerleri baqylaý júrgizetin arnaıy oryndar jabdyqtaldy. Qala men oblys aýmaǵyndaǵy tártip saqshylary men quqyq qorǵaý qyzmetkerleriniń jumysy kúsheıtildi». Joǵaryda aıtylǵan qaýipsizdik jumystary men basqa da uıymdastyrý sharalary Krasnoıarskiden kelgen delegasııany da beıjaı qaldyrǵan joq. «Biz Almatyǵa tájirıbe jınaý maqsatynda keldik. Kórgenimiz ben túıgenimiz kóp boldy. Ýnıversıadany joǵarǵy deńgeıde ótkizdińizder. Almatyda jańadan boı kótergen sporttyq keshender ǵana emes, jańa turǵyn úı aýdandarynyń qurylysy, sondaı-aq, qalany abattandyrý shara­larynyń oń jolǵa qoıylýy bizdi tánti etti. Qazaq halqy – qashan da baryn qonaǵynyń aldyna tosatyn qonaqjaı halyq. Uıymdastyrýshylar ǵana emes, jarysty tamashalaýǵa kelgen qala men aımaq turǵyndary da qazaqstandyqtardyń sportqa degen qyzyǵýshylyǵynyń zor ekenin kórsetti. Osylardy eskere kele, aldaǵy Ýnıversıadany ótkizý daıyndyǵy kezinde sizderdiń tájirıbelerińizge súıenemiz. Tek iri shyǵyndardy eseptegende Krasnoıarskidegi Ýnıver­sıadany ótkizýge shamamen bir mıllıar­d dollar qarjy jumsaý josparlanyp otyr», – dedi Krasnoıarsk qalasynyń basshysy Edham Akbýlatov. Krasnoıar ólkesi úkimetiniń tóraǵasy Vıktor Tomenkanyń sózine súıen­sek, stýdentterdiń qysqy Ýnı­versıadasyna daıyndyq jumystary qarqyndy túrde júrgizilip jatqan kórinedi. «Turǵyn úılerdiń qury­lysyna keler bolsaq, jańa nysandar salynýy múmkin nemese buryn­ǵylardy qaıta jóndeýden ótkizetin bolamyz», – dep atap ótti reseılik meıman. Sonymen qatar, krasnoıarlyq delegasııa almatylyq kásipkerlermen kezdesip, eki jaqty yntymaqtastyqty damytý máselelerin talqylady. Almatylyq kásipkerler azyq-túlik taýarlary men ónerkásip ónimderin Krasnoıar ólkesine jetkizip, qazaq­standyq ónimderdiń sol jerde molynan taralýyna nıetti ekendikterin jetkizdi. Aıta keteıik, 2016 jyldyń qorytyn­dysy boıynsha, Qazaqstan men Krasnoıar ólkesiniń arasyndaǵy taýar aınalymy 2,5 esege artqan. Ásirese, joǵary tehnologııalyq ónimderdiń eksporttyq taýar jetkizilimi aıtarlyqtaı ósken. Qazaqstannyń halyqaralyq arena­­daǵy bedelin kóterip, dańqyn aspandat­qan XXVIII Dúnıejúzilik qys­qy Ýnıversıada jaıly ózge el ókilde­riniń bildirgen jyly lebizderi bizdiń mereıimizdi ósire túsetinin aıta ketkenniń artyǵy joq. Arman OKTIаBR, jýrnalıst ALMATY