Shyrsha jınaýǵa shyndap kiristi

Jańa jyl merekesi ótip, slavıan halyqtarynyń túsinigindegi «eski Jańa jyldy» shyǵaryp salǵannan keıin, úıdegi jasyl shyrshanyń da «qyzyǵy» qalmaıdy. Qalalyqtardyń bári ony qoqysqa shyǵaryp tastaıdy. Sodan kóp qabatty úılerdiń mańynda tóbe-tóbe bolyp jas qaraǵaılar shashylyp jatatyn. Oblystyq «Nasha gazeta» gazetiniń redaksııasy uıym­dastyrǵan «Qosh bol, shyrsha!» eko­logııalyq aksııa­synan keıin osy kórinisti jurt umytýǵa aınal­dy. Gazet redaksııasy bul aksııa­ny 2004 jyly bastaǵan bola­tyn. Olar qalany taza ustaýǵa qa­lalyqtardyń nazaryn aýda­rý úshin sol jyly gazet oqyr­man­da­ryn uıymdastyryp, 100 shyrsha jı­napty. – Kelesi jyly qalalyqtar aksııamyzdy dýyldatyp qoldap ketsin. 2005 jyly 1500 shyrsha jınaldy, barlyǵyn tizbesem de, keıingi jyldardy aıtaıyn. 2015 jyly – 4110, ótken jyly – 4421, bıyl 4684 shyrsha jı­na­dyq, – deıdi gazet redaktory Olga Kolokolova. Gazet redaksııasy bul ıgilik­ti iske oblystyq bilim basqar­masyn da tartady. Bıyl «Qosh bol, shyrsha!» aksııasyna qatys­qan 12 bilim oshaǵynyń arasynan №16 orta mektep 1453 jas qaraǵaı jınap, jeńimpaz atandy. Qala tazalyǵyn saqtaý isine jarııalanǵan tenderden jumys utyp alǵan «AVZ» JShS jas qaraǵaılardy syrtqa tasıdy. – Olardyń júk mashınasyna bir tasyǵanda 115 jas qaraǵaı syıady. Sonda 4600-den asa aǵash­ty qansha ret tasıtynyn esepteı berińiz, – deıdi Olga Kolokolova. Al kesilgen qaraǵaılar qoqysty kóbeıtpeı, ári qaraı paıdaǵa asady. Ony jer úıde turatyndar keptirip otqa, mon­shaǵa jaǵady, jolda qar toq­tatý isine paıdalanylady, ýaq mal­ǵa, qoıanǵa vıtamıni kóp, tap­tyrmaıtyn jem-azyq­tyǵy taǵy bar. Sońǵy kezde áýesqoılar odan aǵash kómirin de daıyndap júr eken. Bıyl qoı ósirýmen aınalysatyn kásipker Esimhan Táshetov ákesimen birge 257 aǵash jınaǵan 1 synyp oqýshysy Darıa Ermakovaǵa voleıbol dobyn syılady. Jeńimpaz mektepterdiń oqýshy­laryna demeýshilerdiń kóme­gimen kınoteatrǵa bılet, konfetter syıǵa tartyldy, al­ǵys hattar tapsyryldy. Gazet redaksııasy 2010 jyly kórshi Reseıde ótken «Eń úzdik aksııa» baıqaýyna qatysyp, úshinshi oryn alǵan bolatyn. Al ózimizde olar úshin ıgilikti is je­ńimpaz bolyp otyr. Qostanaı qalasy Qazaqstandaǵy eń qolaı­ly, taza qalalar úshtigine kiredi. Osyndaı ekologııalyq aksııanyń da oǵan qosqan úlesi bary sózsiz. Názıra JÁRIMBETOVA, «Egemen Qazaqstan» QOSTANAI