Májiliste 2017 – 2019 jyldarǵa arnalǵan respýblıkalyq bıýdjet týraly zań jobasy qaralady, dep jazady strategy2050.kz.
Spıker Nurlan Nyǵmatýlınniń tóraǵalyǵymen Májilis Bıýrosy ótti. Onda salalyq komıtetterdiń usynysymen Palatanyń aldaǵy jalpy otyrysynda qaralatyn kún tártibiniń jobasy naqtylandy, dep habarlady Májilistiń baspasóz qyzmeti.
Jańa zań jobasy boıynsha, 2017-2019 jyldarǵa arnalǵan respýblıkalyq bıýdjetti bekitýde munaıdyń quny búginge deıin belgilengen 35 dollardan 50 dollarǵa kóterilip, dollardyń baǵamy 360 teńgeden 330 teńgege túsirildi. Al metall quny 2016 jylǵy kórsetkishten 5,5 paıyz artyq bolady dep esepteldi. Bul týraly QR Ulttyq ekonomıka mınıstri Tımýr Súleımenov málimdedi.
Depýtattardyń talqylaýyna birinshi oqylymǵa «Qazaqstan Respýblıkasynyń keıbir zańnamalyq aktilerine quqyq qorǵaý júıesin jetildirý máseleleri boıynsha ózgerister men tolyqtyrýlar engizý týraly» zań jobasy shyǵarylatyn boldy.
Ekinshi oqylymda úsh zań jobasy: qylmystyq-atqarý zańnamasyn jetildirý men azamattyq zańnamany jetildirý máseleleri boıynsha ózgerister men tolyqtyrýlar engizý jáne ekologııalyq máselelerge engiziletin jańalyqtar talqylanatyn bolady.
Kún tártibinde Májiliske jańadan kelip túsken zań jobasy da boldy. Ol – «2017 – 2019 jyldarǵa arnalǵan respýblıkalyq bıýdjet týraly» Qazaqstan Respýblıkasynyń Zańyna ózgerister men tolyqtyrýlar engizý týraly» Qazaqstan Respýblıkasy Zańynyń jobasy. Osy zań jobasy boıynsha salalyq komıtetke qorytyndy ázirleý tapsyryldy.
