Pákistanda Áýlıe Valentın kúnin toılaýǵa tyıym salyndy

Pákistan astanasy Islamabadtyń joǵarǵy soty Áýlıe Valentın kúnin musylman mádenıetine qaıshy keledi dep tanyp, qalada merekeni toılaýǵa tıym saldy. Bul týraly Bı-Bı-Sı-diń reseılik qyzmeti habarlady. Sot qoǵamdyq oryndar men memlekettik mekemelerde merekege arnalǵan is-sharalar ótkizýge tıym salǵan. Sondaı-aq BAQ ókilderine de «ǵashyqtar kúnine» qatysty qandaı da bir oqıǵany baıandaýǵa nemese jarnamalaýǵa ruqsat berilmeıdi. Sot bul sheshimdi Áýlıe Valentın kúnin toılaýdyń ıslam ilimine qaıshy keletini týraly jazylǵan petısııadan keıin qabyldaǵan. The Dawn gazetiniń aqparynsha, petısııada «ǵashyqtar kúnine» arnalǵan is-sharalardyń adamgershilikke jat kózqaras pen orynsyz minez-qulyqtyń taralýyna aparatyny aıtylǵan. Sońǵy jyldary bul mereke Pákistanda keńinen tarala bastady. Áýlıe Valentın kúnin eldiń iri qalalary erekshe belsendilikpen toılaýda. Biraq, kóptegen dinı toptar oǵan qarsy pikirlerin bildirgen. Bir jyl buryn el prezıdenti Mamnýn Hýseın Áýlıe Valentın kúnin toılaýdan aýlaq bolý kerektigin, sebebi, bul mereke Pákistan mádenıetine sáıkes kelmeıtinin málimdegen bolatyn. Bıyl Kohat qalasynda 14-aqpanǵa ashyq hattar men merekelik taýarlar satýǵa tıym salyndy. Sondaı-aq Peshavar qalasynda merekeni toılaýǵa ruqsat berilmedi. Keıinirek eki qalanyń da bılik ókilderi tıym salý týraly habarlamanyń eskerilmegenin málim etken.