«QazTransGaz» dabyl qaqqyshtar ornatyp berdi

  Jylytý maýsymy kezinde Qazaqstannyń basqa óńirlerindegi sııaqty Ońtústikte de qaıǵyly oqıǵalar bolyp turady. Jyl basynda Shymkentte gaz qubyryn durys jalǵamaǵandyqtan eki qabatty saman úı qoparylyp qulaǵan. Oqys oqıǵadan órimtaldaı jas kelinshek qaza boldy. Onyń shaqalaǵyn qutqarýshylar besik saqtap qalǵan desedi. Osy úıdi jaldap turyp jatqan eki otbasynyń zardap shekpegeni joq. Sebep bireý. Negizgi jeliden as ázirleıtin plıta men kamınge jalǵanǵan shlangada kógildir otyn syǵyndysy jınaqtalyp gazǵa ot bergende atylǵan. Osyndaı qaıǵyly jaǵdaılar oryn alsa da kóptegen turǵyndar kógildir otyndy qalaýlarynsha jalǵap alyp, «shyqpa janym, shyqpamen» otyra beredi. Talapqa saı jasap alýlaryna basqa tartsa aıaqqa jetpeıtin jetispeýshilik bóget bolyp, kúnde erteńmen arqany keńge salady. 2016-2017 jyldary jylytý maýsymy kezinde Qazaqstanda tunshyqtyrǵysh gazdan ýlanyp, aqaýy bar gaz jabdyqtarynyń jarylýynan 26 adam kóz jumdy, 65 adam zardap shekti. Bul qaıǵyly oqıǵalardyń basym bóligi Ońtústik Qazaqstan oblysynda tirkeldi. Munda bolǵan 12 oqys oqıǵadan 12 adam kóz jumdy. Olardyń ekeýi balalar. Sondyqtan kógildir otyn men gaz jabdyqtaryn paıdalaný kezinde bolatyn tótenshe jaǵdaılar men qaıǵyly oqıǵalardyń aldyn alý maqsatynda «QazTransGaz» AQ Shymkent qalasyndaǵy áleýmettik jaǵdaıy tómen 30 otbasyǵa syılyq retinde gaz sıgnalızatorlaryn tabys etti. – Aqpannyń ekinshi jartysynda ońtústikte kún jylyna bastaıdy. Sonyń saldarynan murjalardyń tartýy nasharlap, turǵyn úılerde tunshyqtyrǵysh gazdyń taralý qaýpi artady, – deıdi «QazTransGaz Aımaq» AQ Ońtústik Qazaqstan óndiristik fılıaly taraptyq uıymdardyń gaz jelilerin jobalaý, salý jáne tehnıkalyq qyzmet kórsetý jónindegi qyzmet bastyǵy Nurlan Qosmambetov. – Biz bul quraldardy tabystaýmen shektelmeımiz. Mamandarymyz barlyq meken-jaıǵa baryp, sıgnalızatorlardy ornatyp beredi. Biz «QazTransGaz» AQ dabyl belgilerin ornatyp bergen otbasylarda bolyp, jaǵdaıymen tanystyq. Chapaevka eldi mekeni Kóksaı-3 shaǵyn aýdanynyń turǵyny Nafısa Bektaeva eki sóz sóılese, kompanııaǵa rahmet aıta beredi. Aıtsa aıtqandaı, turmystyq áleýeti tómen otbasy bul qurylǵylardy óz aqshasyna satyp alyp, ornatýy qıyn eken. Otaǵasy ǵana jumys isteıdi. Nafısa úsh kishkentaıymen úıde otyr. – Buryn bir jaqqa shyǵar bolsaq, qyzdarymyzǵa gazdy qospaýdy tapsyryp, shybyn janymyzdy shúberekke túıip júrer edik, – deıdi Nafısa. –Qurylǵyny tegin ornatyp bergen mamandar endi eshqandaı qorqynysh joq ekendigin aıtady. Dabyl qaqqysh eki tetiktiń bireýi tunshyqtyrǵysh ýly ıis shyqsa bebeý qaǵyp, ekinshisi avtomatty túrde gazdy óshirip tastaıdy eken. Árıne, ózimizdiń kúshimizben ornata almas edik, sondyqtan, «QazTransGaz» kompanııasyna otbasymyzdyń atynan rahmet aıtamyz. Gaz mamandary sol kúni Alataý kóshesi boıynda turatyn Temirbaevtar otbasyna da gazdyń taralýyna jol bermeıtin dabyl qondyrǵylaryn ornatyp berdi. «Jylytý qazandyǵymyzdan ıis shyǵyp, qatty qor­qynysh­ta bolǵan edik. Jón dedik degenimen kógildir otyn­­nyń qaýpi bólek qoı. Endi alańdamaıtyn boldyq». Úı­­leri­ne qondyrǵylar ornatqan otbasylar osylaı deıdi. Saqtanǵandy ǵana qudaı saqtaıdy. «Bári bir Alladan» dep jaǵańdy jaılaýǵa jiberip, saqtyq sharalaryn jasamasań, keıin orny tolmastaı opyndyryp jatady. Muny osy sharalardyń basynda bolǵan Shymkent qalalyq tótenshe jaǵdaılar basqarmasynyń bólim basshysy Asqar Jaqııanov ta aıtqan. – Biz eskertpe qaǵazdar taratyp júrmiz. Munda qaýipsizdik sharalarynyń erejelerin saqtaý jóninde aqparat bar. Ásirese, jylytý maýsymy aldynda barlyq murjalardy, gaz qondyrǵylaryn mindetti túrde teksertip tazartyp alý kerek, – deıdi ol. Buryn úı ishindegi gaz jabdyqtaryna tehnıkalyq qyzmet kórsetý gaz qyzmetkerleriniń quzyrynda bolatyn. Qazir bul qyzmet básekelestik ortaǵa – jeke kompanııalarǵa berildi. Qazaqstan Respýblıkasynyń zańnamasyna sáıkes úı ishindegi gaz jabdyqtarynyń durys jumys isteýine tutynýshylardyń ózderi jaýapty. Turǵyndardyń qaýipsizdigin qamtamasyz etýde tabıǵı jáne tunshyqtyrǵysh gaz taraǵan kezde iske qosylatyn ajyratqyshtar men sıgnalızatorlar óte tıimdi qural bolyp tabylady. Murja tartpaı qalǵanda nemese tun­shyqtyrǵysh gaz bólme ishine taraǵanda bul quraldar avto­mat­ty túrde dabyl qaǵyp, gaz jabdyqtarynyń jumy­syn toqtatady. Oǵan qosa bul quraldar asa qym­bat ta emes jáne gaz jabdyqtary satylatyn kez kelgen dúkennen tabylady. Mysaly, Reseıde gaz sıgnalıza­torlary ornatylmaǵan turǵyn úıler men ózge de ǵımarattardy tabıǵı gaz júıesine qosýǵa tyıym salynǵan. Gaz salasyndaǵy ulttyq operator tarapynan jer­gilikti BAQ-tar men ınternet-resýrstarda aqaýy bar gaz jab­dyqtarynyń qaýpi týraly maqalalar udaıy jarııa­lanyp turady. Tele jáne radıo arnalarda qaýipsizdik jónindegi rolıkter kórsetiledi. Turǵyndarmen kezdesýler ótkiziledi, kommýnaldyq qyzmetter úshin aqy tóleýge arnalǵan esep-shottarmen qatar «Gazdy turmysta paıdalanýdyń qaýipsizdik erejeleri» taqyrybynda ınfografıkaly jadynamalar taratylady. Tótenshe jaǵdaılar departamenti qyzmetkerlerimen birlesip qaýipsizdik jónindegi reıdter uıymdastyrylady. Alaıda, tájirıbe kórsetkendeı, bul sharalardyń barlyǵy turǵyndar úshin azdyq etetin sııaqty. Sondyqtan da tótenshe jaǵdaılar komıteti men «QazTransGaz» kompanııasy birlesip saqtyq sharalary barysynda osylaısha jumys jasap júr. Turmysy tómen otyz otbasyǵa gaz sıgnalızatoryn tegin ornatyp berýmen is bitpeıtindigin biledi. Múmkindiginshe, barlyq otbasylardyń aman bolǵanyn, ár úıde dabyl qaqqysh ornatqandaryn qalaıdy. Baqtııar TAIJAN, «Egemen Qazaqstan» Ońtústik Qazaqstan oblysy