«Temany» sheshý úshin júrmiz ǵoı...»

Ol tipti sóılemeı-aq túrli qımyl jasap, bet-beınesin qubylta bas­taǵanda, kó­rermen kúl­kige qaryq bolady. «Jaq­tyrmasań, jaqtyrma. Oıynshyq pa saǵan, aq tyrna?» deımiz keıde ózimsingen ja­qynǵa. «Jaqynda eki klıpim shyǵady» dep maqtanamyz. «Jú­reıin sol botı kıip ap», – dep kergıtinimiz taǵy bar. Ańqaý erli-zaıyptyǵa kez bol­ǵan aramza táýip te, halyqtyń jaǵ­daıynan habary joq shikireıgen sheneýnik te áli es­ten shyǵa qoıǵan joq. Dombyrasyna úki ornyna túl­kiniń te­risin baılap shyǵatyn maqtanshaq aqyn, rýhanı álsizdigin jasy­rý úshin myqty bop kó­rinýge tyrysatyn qýys keýde ákim, aýǵan soǵysy aqylyn shaı­qap jibergen edireń ba­tyr, usaq-túıek úshin áıelimen sal­ǵy­lasatyn myl­jyń kúıeý, bas­qa da kóptegen bir-b­irine múlde uq­­samaıtyn keıip­kerlerdiń galereıasyn jasaǵan bir satıra akteri bar bolsa, ol – Nurjan Tólendıev. Iá, ol birese dańǵoı rejısser, birese beıshara mıllıoner. Halyq ony Týka dep, Qoshan dep tanıdy. «Tema ne? Temany aıtsaı, sheshý úshin júrmiz ǵoı!» – dep zildenetin oqqaǵardyń «qamqorshysy» da jadymyzda qap qoıǵan. Ol qandaı róldi oınasa da, baryn salyp, janyn salyp, eń bastysy – sendirip oınaıdy, kúlkiniń jeńil-jelpi túrin emes, yzaly, ýytty kúlki týǵyzady, «shynynda da, osyndaı adamdar bar ǵoı, á» degen sııaqty oılantyp tastaıdy. Qazirgi «Aldaraspan» oıyn-saýyq otaýy­nyń basshysy Nurjan Tólendıev halyqqa «Shanshar» teatry arqyly tanyldy. Nurjannyń belgili rejısser Raıymbek Seıtmetov syndy ustazdyń aldyn kórgen kásibı akter ekenin, Túrkistan teatrynyń sahnasynda dramalyq rólderdi de somdaǵanyn bylaıǵy kópshilik bile bermeýi múmkin. Ekinshi myńjyldyqtyń basynda bizdiń keıipkerimiz Túrkistan teatrynyń sahnasynda dramalyq rólderdi somdaı júrip te ózin talantty akter retinde kórsete bildi. Jýyrda Nurjanmen az-kem sóılesýdiń sáti tústi. Saýaldy únemi gas­trolderde júretin óner adamynyń ýaqytqa qurmeti jóninen bastaǵanbyz. – Ýaqytty bosqa jiberip alýdan asqan ókinish joq. Basshylyq pen akterlikti qatar alyp júrgennen keıin árbir atqan tańymdy bosqa jibermeýge tyrysamyn, – deıdi akter. Túrli obrazdar shyǵarý úshin kópshilik ortada kóbirek bolatynyn da aıtyp qaldy. – Somdaıtyn beınelerdiń bárin eldiń arasynan alamyz. Sodan bolar, halyqtyń júregine tez jetedi degen oıdamyn. «Nurjan, seniń ana obrazyń meniń jezdeme uqsaıdy eken, myna obrazyń bir týysyma uqsaıdy» – dep jatady tanystarym. Múmkin uqsaıtyn da shyǵar? Áshirbek Syǵaıdyń keremet bir sózi bar. «Sýretshi boıaýy­na, ánshi daýsyna senedi. Al akterdiń bar seneri – jan dúnıesi, júıkesi, júregi». Osy turǵydan kelgende shynaıy oınaýǵa tyrysamyz, barymyzdy, janymyzdy salamyz. Iаǵnı «sol adamdy» alyp shyǵýǵa áreket etemiz. Akter qoǵamdaǵy bolyp jatqan jańa­lyqtardy, oqıǵalardy qalt jibermeı baqylap otyratynyn, árdaıym halyqtyń talǵamymen sanasatynyn jetkizdi. – Arzan kúlkini, asyǵys jasalǵan dúnıeni halyqqa ótkizý qıyn. Qazir adamdardyń bári aqyldy, kózi ashyq. Olardyń talǵamymen sanasý qajet. Búgin kúlkili bolǵan oqıǵa dál erteń kúlkili bolmaı qalýy yqtımal. Búgin ózekti bolǵan másele biraz ýaqyt óte kele ózektiligin joǵaltyp jatady. Sol úshin biz árdaıym izdeniste júremiz. Adamdardy kúldirý, halyqtyń kóńilinen shyǵý ońaı emes. О́ner adamynyń kóńili kóktemniń kúnine uqsas. Kóktem birde daýyldy, birde jaýyndy, birde shýaqty bolmaı ma? Akter de birde syrshyl, birde jyrshyl, keıde jarqyn, keıde tuıyq, keıde muńdy, – deıdi keıipkerimiz. Izdenis te, halyqpen aralasý da akter úshin kerek dúnıe ǵoı. Biraq, Alla talant bermese, halyq qoshemettep qol soqpasa, moıyndamasa, qansha izdenip, ter tókkenińnen, adamdardyń arasynda júrgenińnen ne paıda? Árıne, bul Nurjanǵa múlde qatysy joq sóz. Kerisinshe, ol óz talantymen, sheberligimen ábden moıyn­dalǵan, budan keıin de moıyndala beretin, halyq qoshemettep qol soǵyp qarsy alatyn akter. Aıgúl SEIILOVA, «Egemen Qazaqstan»