«Synaqtyń qandaıyna bolsa da daıynmyn»

Dzıýdo kúresinde ózindik qoltańbasymen jarqyraı kóringen balýannyń biri, Azııa chempıonattarynyń kúmis jáne qola júldegeri, Azııa oıyndarynyń kúmis medal ıegeri Islam Bozbaev eki jyldaı úzilisten keıin el quramasyna qaıta oraldy. Oralǵanda da daryndy dzıýdoshy qanjyǵasy maılanyp, oljaly oraldy. Ol Ázerbaıjan astanasynda ótken Grand Slam týrnırinde 90 kılo salmaq dárejesinde top jaryp, mundaı deńgeıdegi dodanyń altyn júldesin utqan tórtinshi qazaqstandyq dzıýdoshy atandy. Keshe elge oralǵan balýanmen telefon arqyly tildesýdiń sáti túsken edi. Tómende sol je­del suhbatty sizderdiń nazar­la­ryńyzǵa usynyp otyrmyz. – Islam, jeńis qutty bolsyn! Jalpy, qurama ko­mandaǵa oralýyń da seniń jan­kúıerleriń úshin qýanyshty oqıǵa bolyp jatyr... – Rahmet! Taǵdyrdyń jazýy shyǵar – qıyn synaqty bas­tan ótkerdim. Osy kezde maǵan senim bildirip, qoldaý kór­set­ken jandardyń bárine, atap aıtqanda jeke bapkerim Ser­geı Dmıtrıenkoǵa, Ult­tyq quramanyń jattyqtyrý­shy­laryna jáne de quramadaǵy dostaryma, ózimniń jankúıerlerime myń márte alǵys aıtqym keledi. О́tkennen sabaq alý – kim-kimge bolsa da asa paıdaly dúnıe dep oılaımyn... – Bakýdegi «Úlken dýlyǵa» dodasyna oralsaq... Qaı beldesý sen úshin, ásirese qıynǵa soqty? – Shynymdy aıtsam, ońaıy bolmady. Gollandııalyq Noel Van Te Endpen aradaǵy ekinshi beldesýdiń asa tartysty ótkenin aıtýǵa bolady. Árıne, mundaı týrnırde fınaldyq beldesýdiń jaýapkershiligi mol bolatyny bar. Qarsylasym, tatamı ıesi Mamedalı Mehdıev myqty balýan­dardyń biri. Gran-prı týrnırleriniń birneshe márte júldegeri, 2016 jyly Eýropa kýboginiń jeńimpazy bolǵan. Mine, osy qarsylasymdy eki vazarımen uttym. – Aldaǵy josparyń týraly aıtyp berseń... – Taıaý kúnderi Shymkent qa­lasynda bolatyn oqý-jattyǵý jıynyna baramyz. Odan keıin qurama komandamen birge Túr­kııaǵa attanamyn. Ol elde 5 sáýir kúni Gran-prı syny ótedi. Osy dodada ózimdi taǵy da jaqsy qyrlarymnan kórsetsem deımin. Shynyn aıtqanda, Bakýdegi jeńis meni qatty jigerlendirdi. О́zime degen senimniń qaıta oral­­ǵanyn sezindim. Men úshin senimdilik – órge súıreıtin, jeńis­terge qulshyndyratyn keremet kúsh. – Qurama komandadaǵy 90 kılo salmaqtaǵy ornyńdy sen joqta kúresken balýandar ońaı­lyqpen bere salmaıtyn shyǵar? – Álbette. Men joqta bul salmaqta Suńǵat Zákarııaev pen Dáý­lethan Jaqypov óner kór­setti. Iаǵnı, 90 kılo salmaqtaǵy básekelestik úsheýimizdiń aramyzda órbıtin shyǵar dep oılaımyn. Jalpy, men synaqtyń qan­daıyna bolsa da daıynmyn. Quramadaǵy ózimniń ornymdy oıyp alyp, mamyr aıyndaǵy Azııa birinshiliginde, tamyzda ótetin álem chempıonatynda kúressem deımin. – Degenińe jet! Áńgimelesken Qaırat ÁBILDINOV, «Egemen Qazaqstan»