Elektrondy kitap saýdasy tómendep, qaǵaz kitaptyń satylymy artty. Bul týraly Nielsen saraptamalyq kompanııasy júrgizgen zertteý nátıjesinde belgili boldy, dep jazady The Guardian. Basylymnyń habarlaýynsha, elektrondy kitapqa degen suranys ótken jylmen salystyrǵanda 4 paıyzǵa tómendegen. Al qaǵaz kitaptardyń saýdasy 7 paıyzǵa artqan.
Mysaly, 2016 jyly Ulybrıtanııada 360 mln kitap satylǵan. Sonymen qatar kitap satyp alýǵa jumsalǵan qarajat 2015 jylmen salystyrǵanda 100 mln fýntqa artqan.
Uıymnyń baıandamasynda qaǵaz kitaptarǵa degen qyzyǵýshylyq álemge tanymal kitaptardyń shyǵýyna baılanysty arta túskendigi aıtylǵan. Sonymen qatar zertteý nátıjesinde belgili bolǵandaı, elektrondy kitapty oqýda eń kóp qoldanylatyn quraldar qatarynda uıaly telefondar men planshetter kósh bastaǵan.
