Qazaqstanda jekpe-jek ótkizgim keledi – Jaqııanov

WBA (Super) nusqasy boıynsha álem chempıony Janat Jaqııanov Astanada jekpe-jek ótkizgisi keletinin aıtty, dep habarlady vesti.kz. «EXPO kezinde ótetin boks keshinde sharshy alańǵa shyǵýym jóninde kelissózder ótip jatyr. Eger bári ońynan sheshilse, óz elimde belbeýimdi qorǵaǵym keledi», – dedi Janat Jaqııanov. Jaqııanov AQSh-tyń Toledo qalasynda amerıkalyq Roýshı Ýorrendi jeńip, elge oralǵannan keıin Qazaqstanda jekpe-jek uıymdastyrǵysy keletinin aıtqan bolatyn. Al elimizdiń kásipqoı boks federasııasynyń vıse-prezıdenti Vıktor Demıanenko Ýorrenmen revansh ótkizse, EXPO-2017 kórmesiniń sánin kirgizetinin málimdedi. Osyǵan deıin Mádenıet jáne sport mınıstri Arystanbek Muhamedıuly Astanada ótetin EXPO kezinde boks keshi uıymdastyrylatynyn rastaǵan bolatyn. Aıta keteıik, búgin Janattyń IBO tıtýlynan aıyrylǵany habarlandy. Alaıda, boksshy artyq shyǵyndalmaýdy jón kórgendikten óz erkimen bul belbeýden bas tartqanyn málimdedi.