Germanııadaǵy halyqaralyq týrnırdiń jartylaı fınalyna 9 boksshymyz shyqty

Germanııanyń Galle qalasynda ótip jatqan «Chemistry Cup» halyqaralyq týrnırinde 9 qazaq boksshysy jartylaı fınalǵa shyqty. Bul týraly Qazaqstan boks federasııasynyń baspasóz qyzmeti habarlady. 64 keli salmaq dárejesinde judyryqtasatyn Bekdáýlet Ibragımov  jarys jolyn erte aıaqtaýǵa májbúr boldy. Degenmen, baıraqty básekeni 9 sportshymyz jalǵastyrady. Naqtyraq aıtar bolsaq, jartylaı fınalda Ádilbek Nııazymbetov (81 kg) ýkraınalyq Maksım Kospen, Qaırat Eralıev (56 kg) amerıkalyq Dıýk Rahanmen, Abylaıhan Júsipov (69 kg) polshalyq Demıan Kıvıormen, Erjan Jomart (49 kg) ekvadorlyq Karlos Kýpomen, Azamat Isaqulov (52 kg) amerıkalyq Gılbert Renterımen, Ádilet Qurmetov (60 kg) amerıkalyq Delante Djonsonmen, Ábilhan Amanqul (75 kg)  germanııalyq Sılvıo Shırlımen, Vasılıı Levıt (91 kg) ýkraınalyq Konstantın Pınchýkpen, sondaı-aq asa aýyr salmaqtaǵy Qamshybek Qońqabaev nemis boksshysy Maks Kellermen judyryqtasady. Aıta keteıik, jartylaı fınaldyń jekpe-jekteri búgin, ıaǵnı 16 naýryzda ótedi. «Chemistry Cup» týrnırine barlyǵy 13 elden 75 boksshy qatysyp jatyr. Qazaqstan quramasy tolyq quramda (on boksshy) keldi.