Astana qalasy ákimdigi «Atameken» Ulttyq kásipkerler palatasymen birlesip «1000 saýda orny» baǵdarlamasyn iske qosty, dep jazady
palata.kz.
Ákimdik saıtyndaǵy habarlamaǵa sáıkes, bas qalanyń Esil aýdanynda – 303, Saryarqa aýdanynda – 305, Almaty aýdanynda 377 saýda nysany ashylady. Alǵashqyda kóshe saýdasyna 274 oryn bólingenimen, keıinnen sanyn myńǵa deıin arttyrý kózdelgen. Shaǵyn jáne orta kásipkerlikti qoldaý maqsatynda uıymdastyrylǵan 1000 saýda ornynda dámhana, mobıldi avtoservıs, nan, kókónis, gúl satý sekildi kóptegen kásip túrleri qamtylmaq. Saýda oryndary qalanyń sáýlet kelbetine, sanıtarlyq jáne órt sóndirý talaptaryna saı bolýy mańyzdy talaptardyń biri.
«Shaǵyn dúken «1000 saýda orny» baǵdarlamasy boıynsha ashyldy. Ápkem arnaıy ótinish jazyp, qajetti qujattar ótkizdi. Bul bizdiń otbasylyq kásibimiz. Buryndary saýda jasaý úshin jyl saıyn ruqsat qaǵaz alýshy edik, al jańa baǵdarlama boıynsha ruqsat birden 7 jylǵa berildi. Árıne, óte yńǵaıly. Jer salyǵyn tóleımiz, tutynǵan elektr qýatyna da ýaqytyly tólem jasaımyz. Kishkene ǵana kásibimizdi aýa raıynyń qandaı bolǵanyna qaramastan, yńǵaıly orynda júrgizetinimizge qýanyshtymyz», – deıdi aǵaıyndy Abzal men Azamat Toılybaevtar.
«Shaǵyn jáne orta kásipkerlikke arnalǵan «1000 saýda orny» baǵdarlamasyn estip qýandym. Qalada kásibimdi ashýǵa yńǵaıly birneshe oryndardy anyqtap alyp, sol mańaıdan saýda ornyn surap bardym. Degenmen men qalaǵan jerde oryndar bos emes eken, al usynǵan jerleri qashyq boldy. Bul baǵdarlama aıasynda jer alyp, kásip júrgizgenim qarjy jaǵynan yńǵaıly bolar edi dep oılaımyn. Sondyqtan, kásip bastaýǵa atalǵan baǵdarlama aıasynda qolaıly oryndy izdestirý ústindemin. Degenmen, qarap otyrǵan joqpyn. Qazir saýda ornyna tıesili jerdi jalǵa aldym. Endi ashylyp jatyrmyz. Áli ishin jóndeýmen, árleýmen aınalysýym kerek», – deıdi kásipker Murat Muhamedjanov.
Astana kásipkerleriniń jyl saıynǵy konferensııasynda Elorda turǵyndarynyń 63% jeke kásipkerlikte jumys isteıtini aıtyldy. Osy jıynda «Atameken» UKP Tóralqa Tóraǵasy Tımýr Qulybaev qalanyń bas josparyna engizilgen «1000 saýda orny» shaǵyn jáne orta kásipkerlikti qoldaýda erekshe bastama bolǵanyn atap ótip, Qazaqstannyń basqa óńirleri biregeı bastamany úlgi retinde qoldanýdy usynǵan edi.
Qalanyń sáýlet qurylysyna saı jasalǵan saýda oryndarynda sanıtarlyq, qaýipsizdik talaptary saqtalǵan, elektr qýaty júrgizilgen. Bul saýda oryndary kásipkerlerge baıqaý negizinde, bekitilgen tártippen beriledi. «1000 saýda orny» baǵdarlamasyna zańmen belgilengen tártipte tirkelgen jáne salyq pen basqa da bıýdjetke tólenetin mindetti tólemder boıynsha qaryzy joq jeke kásipkerler nemese zańdy tulǵalar qatysa alady. Qajetti qujattar paketine ótinim-anketa, jeke-kásipkerdi nemese zańdy tulǵany tirkeý týraly kýáliktiń kóshirmesi, qajet jaǵdaıda ókilettigin kýálandyratyn qujat, salyq boıynsha qaryzy joqtyǵy týraly anyqtama, aýdany 9 sharshy metr saýda nysanynyń eskızi, ony daıyndaýshy zaýyt týraly málimetter kórsetilýi kerek. Jer ýchaskesi 5-7 jylǵa jalǵa beriledi.
Sonymen qatar, saýda ornynyń baıqaýyna memlekettik jáne zańdy tulǵalar, komıssııa músheleri, komıssııa hatshysy, baıqaýda jeńimpaz bolǵandar, sýbarenda boıynsha talaptardy oryndamaǵan kásipkerler qatystyrylmaıdy.
О́tinimderdi qabyldaý týraly habarlandyrý Astana qalasy ákimdiginiń saıtynda jarııalanǵan soń, 15 kúntizbelik kúnniń ishinde elektrondy túrde www.smart.astana.kz saıtynda tapsyrylady.
