«Meniń aǵashym menimen birge ósedi»

Ońtústik Qazaqstan oblysy - qazaqtyń quıqaly bir óńiri. Kóshetti teris qadasań da tamyrlanyp, daraqqa aınalatyn qunarly aımaqtary da bar. Sonyń biri - Saıram aýdany. Bul jaqtaǵy adamdardyń dıqanshylyqpen ataǵy shyqqan. Saıram aýdanyna jol júrseńiz, aýyl-aýyldarda ıgerilmegen úı irgelik jer tappaısyz. Ata, aǵalarynyń osy eń­begin kórip ósken mektep oqý­shylary da jastaıynan eńbekqor bolyp ósedi. Qazir Ońtústiktiń ár aýda­n, qalalarynda oblys ákimi Janseıit Túımebaevtyń bas­ta­masymen kóshetter egý naý­qany júrip jatyr. Osy naýqanǵa úles qosqy­sy kelgen Saıram aýdanynda 72 orta mekteptiń bıyl bilim uıasymen qoshtasatyn túlekteri bir-bir kóshet ákelip mektep aýlasyna otyrǵyzdy. Mektep oqýshylarynyń «Meniń aǵashym menimen birge ósedi» aksııasynda aýda­n aýmaǵynda 10 418 kó­shet tamyr jaıdy. Aksııaǵa qatys­qan Shyńǵys Báıseıitov atty oqýshy «biz otyrǵyzǵan kóshetterdiń ishinde alma, órik, shıe sııaqty jemis aǵash­tary bar. Bıyl mekteppen qoshtasamyz. Kishkentaı kú­nimizden qolymyzǵa «Álip­­pe» ustatyp, saýaty­myzdy ashqan, úlken ómir­ge daıyndaǵan altyn uıamyzǵa jaqsy eskertkish qal­dyrǵymyz keledi. Biz ekken jemis aǵashtary adam­darǵa jaqsy densaýlyq, kóte­rińki kóńil kúı syılasa deımiz. Sondyqtan, ekken daraǵymyzdy bastaýysh sy­nyptyń balalaryna tapsyrdyq. Olar qamqorlyq jasap ósiredi. Árıne, bos ýaqytymyzda ózimiz de kelip kútip, baptaýyna aralasamyz». Bul joly atalar emes, mek­teptiń túlekteri sońdarynan ergen jas óskinderge on myń­nan astam kóshet egip, tapsyryp barady. Saıram aýdandyq bilim bóliminiń basshysy Orazkúl Qoldasova qolyna ketpen ustap, aksııaǵa qatysqan jo­ǵa­ry synyp oqýshylaryna razy. О́ıtkeni, olar jemis aǵash­taryn egip qana qoıǵan joq, ózderinen keıingi oqý­shylarǵa úlken ónege kórsetti. Búginde Saıramdaǵy 72 mektepte 40 myńǵa tarta joǵa­ry synyp oqýshylary ekken kóshetter jaıqalyp tur. Elge eńbek etý degen osyndaı izgi isterden bastaý alady. Baqtııar TAIJAN, «Egemen Qazaqstan» Ońtústik Qazaqstan oblysy