«Qazposhta» – jańa formatta

«Qazposhta» AQ elimiz boıynsha óz fılıaldaryn jańǵyrtý jumystaryn jalǵastyrýda. Búginde ShQO, OQO, Qaraǵandy, Almaty jáne elimizdiń ózge aımaqtarynda jańartylǵan poshta bólimsheleri iske qosyldy. Sondaı-aq Aqtóbe, Atyraý, Oral, Qyzylorda, Taldyqorǵan, Taraz jáne Aqtaý qalalaryndaǵy jóndeýden ótken bólimsheler ashyldy. Almaty qalasynyń jańǵyrtylǵan bólimshesiniń ashylý saltanatyna «Samuryq-Qazyna» AQ basqarma tóraǵasy О́mirzaq Shókeev pen qala ákimi Baýyrjan Baıbek qatysty. Kez­desý barysynda «Qazposhta» AQ-tyń bas­qarma tóraǵasy Sáken Sársenov jańar­tylǵan bólimsheniń jumysymen tanys­tyryp, kompanııanyń qyzmetterin odan ári damytý jónindegi josparlarymen bólisti. «Biz barlyq bólimshelerimizdi jańar­typ, olardyń ınfraqurylymyn jańǵyr­typ, bıznes-prosesterdi qaıta qarastyryp jatyrmyz. Kezekte turmaı-aq, kóptegen qujattardy toltyrmaı jańa keńselerge kelip qyzmetterdi alý múmkindigi almaty­lyq­tardyń kóńilinen shyǵady dep úmittenemiz. Shaharda qazir 4 jańartylǵan bólimshe bar, jospar boıynsha 18 bólimshe jańartylmaq», dedi «Qazposhta» basshysy. Sáken Sársenovtiń aıtýynsha, poshta bólimshelerin jańǵyrtý barysynda jumys keńistigin ońtaılandyrýǵa erekshe kóńil bólingen: operasııalyq bólmelerdiń aýqymy fýnksııalyq emes kabınetterdi joıý arqyly 9 myń sharshy metrden 19 myń sharshy metr­ge deıin ósken. Sondaı-aq, jańartylǵan bólimshelerde bir deńgeıli jáne kedergisiz qyzmet kórsetý terezeleri engizilgen, jeke jáne korporatıvtik tutynýshylarǵa qyzmet kórsetý oryndary, poshta jáne qarjy qyzmetteri zaldary bólingen, operasııalyq terezelerdiń sany kóbeıtilgen. Jańǵyrtylǵan bólimshe jumy­symen tanysyp shyqqan О́.Shókeev: «Qaz­poshta» jumysynyń áleýmettik júgi aýyr bolǵandyqtan «Samuryq-Qazyna» barynsha kómektesip otyr. Buryn negizgi kiris kózi hattardan túse­tin edi. Endi basqa tabys kózderin, aqsha aýdarymdary sııaqty banktik qyzmet­terdi, tranzıttik qyzmet kórsetetin elektrondy kommersııany jetildirý kerek. Naryq zamanynda básekege qabiletti bola bilý úshin poshta júıesin jańǵyrtyp úlgerýge tıispiz», dedi. «Samuryq-Qazyna» AQ-tyń qu­ramyn­daǵy kompanııalardyń jumys tıimdiligin arttyrý maqsatynda 2014 jyly iske qosylǵan transformasııalaý baǵdarlamasy aıasynda bólgen 3 mlrd teńgege baılanys jumystaryn jańǵyrtýdy qolǵa alǵan «Qazposhta» jyldyń aıaǵyna deıin elimiz boıynsha taǵy 54 bólimshe, al eki jyldyń ishinde 298 bólimshe ashý isin qolǵa alyp otyr. Baǵdarlama boıynsha 197 eldi mekende ornalasqan 400 posh­ta bólimshesin jańartýdy josparlaǵan «Qazposhta» elimizdegi poshta qyzmetin barynsha arttyrýdy kózdeıdi. «Jańǵyrtylǵan bólimshelerdiń erek­sheligi – kezeksiz qyzmetter kórsetý ǵana emes, alys aýyldarǵa bir-eki kún ishinde gazet-jýrnal, basqa da tapsyrystardy dereý jet­kizip berý. Bizge básekeles kompanııalar kóp bolǵanymen, olar tek qalalarda ǵana jumys isteıdi. Al shalǵaı jerdegi aýyldarda ondaı kompanııalar emes, tek «Qazposhta» ǵana jumys isteıdi», deı kele, «Qazposhta» AQ basqarma tóraǵasy S.Sársenov atalǵan bólimshelerdiń jańǵyrýy tek kúrdeli jóndeýdi ǵana emes, sonymen qatar, tehno­logııalyq quramdardyń jańarýyna da ula­sa­tynyn, barlyq jańǵyrtylǵan baıla­nys bólimsheleri biryńǵaı elektrondy kezek júıesimen, beıneqadaǵalaý jáne órt qaýip­sizdigimen qamtamasyz etilgenin jetkizdi. «Jańa jumys formatyna kóshý halyqqa qyzmet kórsetý sapasyn arttyrýmen birge, sálemdemelerdi alý jáne jóneltý rá­sim­derin ońtaılandyrýǵa múmkindik beredi. Qazirdiń ózinde sálemdemelerdi qabyldaý jáne jóneltý ýaqyty 2-3 mınýtqa deıin qys­qardy, al sýpermarketter arqyly beriletin sálemdemeler sany eki esege artqan. Bul biregeı sýpermarket tek Qazaqstanda ǵana bar joba. Kanadadan, Gollandııadan kelgen árip­testerimiz ondaı sýpermarketterdi óz elderinde de ashqysy keletinin aıtqan bolatyn. Sol sııaqty, postamat qyzmeti de kez kelgen elde bola bermeıdi. Biz postamattardy úlken bólimshelerge qoıamyz», dedi S.Sársenov. Mıra BAIBEK, «Egemen Qazaqstan» ALMATY