«Qazaqfılm» kınostýdııasynyń shańyraq kótergenine – 70 jyl
Naqty derekke súıensek, Qazaq SSR Halyq Komıssarlary Keńesiniń 1941 jylǵy 12 qyrkúıektegi №762 qaýlysyna sáıkes Almaty kórkemfılm kınostýdııasy qurylyp, munan keıin 1960 jyly bul at «Qazaqfılm» kınostýdııasy bolyp ózgergeni málim. Odan sońǵy mádenıet oshaǵy tarıhyndaǵy aıtýly oqıǵanyń biri – 1984 jyly «Qazaqfılm» kınostýdııasyna qazaqtyń aıtýly kınorejısseri, sahna sańlaǵy Sháken Aımanovtyń esimi berilgendigi. Osy aralyqta 228 tolyqmetrajdy, 70 qysqametrajdy kórkemfılm ekranǵa jol tartsa, 1133 derekti, 139 anımasııalyq týyndy kórermenniń kózaıymyna aınalyp úlgerdi.
«Elý jylda – el jańa» deıdi halqymyz. Endeshe, búgingi kórermen talǵamy men talabyna saı ónim usyný kınogerlerge úlken jaýapkershilik júkteıdi desek, «Qazaqfılm» kınostýdııasy da ózin sońǵy ýaqytta tyń ıdeıalar men jobalar arqyly tanyta túsýde. Stýdııanyń alǵashqy kezeńi men qazirgi tynysyn salystyrǵanda, arasy jer men kókteı dep aıtýǵa bolady. Sh.Aımanov atyndaǵy búgingi «Qazaqfılm» aksıonerlik qoǵamy zaman únine saı tehnologııamen jabdyqtalǵan joǵary úlgidegi kınostýdııa sanalady. Halyqqa sapaly ónim usynýda ózge áriptesterinen oq boıy ozyq kele jatqan stýdııanyń negizgi maqsaty kórermendi kórkem, derekti, anımasııalyq týyndylarmen qamtamasyz ete otyryp, sheteldik fılmderdi qazaq tiline tárjimalaý desek, stýdııada sandyq keshenniń bolýy qazirgi kórermen talǵamynan shyǵýǵa jasalǵan taǵy bir múmkindik ekeni ras. Ortalyq Azııa boıynsha tek qana Qazaqstanda ǵana «Dolby» qaıtalap jazý júıesiniń orny erekshe sanalady. Dybystyq jazbalar, tárjimalaý, ónimdi túrli formatqa túsirý, t.t sol sııaqty negizgi jumystardyń júzege asyrylýy ýaqytqa saı jańǵyryp, eki túsirilý pavılonyna ıe bolý degenimiz qazaq ulttyq kınoóneriniń jańa beleske kóterilýiniń birden-bir aıǵaǵy bolyp tabylady. Jańa tehnologııamen jabdyqtalǵan anımasııalyq keshen de alýan túrli qyzmetimen nazar aýdartady. Al endi onyń naqty nátıjeleri týraly sóz etsek, sońǵy jyldarǵy qarqyn aıtarlyqtaı, ekranǵa kórkemdik deńgeıi men sapasy kóńil kónshiterlik dúnıeler kóptep shyǵa bastady. Rejısser Farhad Sháripovtiń «Qyzǵylt qoıan týraly ertegi», Aqan Sataevtyń «Lıkvıdator», Rústem Ábdrashevtiń «Balalyq shaǵymnyń aspany», Qanaǵat Mustafınniń «Sekiris», Erjan Rústembekov pen Aleksandr Chernıaevtiń «Mahabbat tálkegi» fılmderi kópshilikten oń baǵasyn alyp, táýelsizdik jyldaryndaǵy qazaq kınosynyń aıtarlyqtaı jemisine baǵalanyp otyr.
«Egemen-aqparat».
