«Shirkin Life» jobasy áli jalǵasady

Ekibastuzdyq oqýshylar da jaz boıǵy demalystary aıaqtalyp súıikti mektepterine oraldy. «Árıne, olar osy bir erekshe joba arqyly demalystaryn qalaı ótkizgenderin qyzyǵa aıtyp ta júrgen bolar. Aǵylshyn tilinen aýdarǵanda, «LIFE» ómir degen maǵynany bildiredi», – deıdi qaladaǵy «Qaınar» bilim berý jáne bos ýaqytty ótkizý kesheni dırektorynyń orynbasary Saıan Qudaıbergenqyzy. Osy arada «Jol kartasy» baǵdarlamasy aıasynda «Qaınar» keshenine 155 mıllıon teńge qarjy bólinip, ishi-syrtyna túgeldeı qaıtadan kúrdeli jóndeý, jańartý jumystary júrgizilgenin aıta ketsek deımiz. Onyń janynan aýdany 1680 sharshy metr bolatyn qosymsha ǵımarattar salyndy. Balalar úshin 200 oryndy jıylys zaly, bı zaly, kafe ashylyp, týrıstik skalodrom iske qosyldy. Jarqyraǵan keshen ishi zamanaýı úlgidegi qural-jabdyqtar, jıhazdarmen jabdyqtaldy. Ortalyqta 60 muǵalim bar. Olar 15 myń balamen jumys jasaıdy, 36 shyǵarmashylyq birlestik, 14 aýla klýby, «Baldáýren» atty balalar jáne jasóspirimder uıymy, «Arman – Radost» án-bı horeografııalyq ansamblderi, alpınıstik-týrıstik klýbtar, balalar teatr ujymdary jumys jasaıdy. Balalardyń jeke tulǵa retinde qalyptasýyna, óziniń bolashaqtaǵy kásibin, mamandyǵyn tańdaýyna, shyǵarmashylyqpen eńbek etýine, qabilet-daryndaryn iske asyrýlaryna bul jerde barlyq jaǵdaı jasalǵan. Sonymen qatar, balalardyń qadaǵalaýsyz qalmaýlaryn, kámeletke tolmaǵandar arasynda quqyq buzýshylyqtyń aldyn alý, bos ýaqyttaryn mazmundy ótkizý, azamattyq sana-sezimdi ósirip, patrıotızmge, otansúıgishtikke baýlý, salamatty ómir saltyn qalyptastyrý, balalardyń jazǵy demalystaryn uıymdastyrý bul keshendi ortalyqtyń negizgi mindetteri bolyp tabylady. Balalar ár sala boıynsha elimizde ótetin barlyq baıqaýlar men konkýrstarǵa qatysady. Bıylǵy jyly ortalyq «Jaz LIFE» atalatyn qalalyq baǵdarlama negizinde jumys jasady. Jalpy, uıymdastyrýshylardyń aıtýynsha, bul baǵdarlama respýblıkalyq «Shirkin LIFE» telebaǵdarlamasy negizinde júzege asqan. Farıda BYQAI. Ekibastuz.