Júzdesý

QULPYRǴAN  QULSARY Astanadan bastaý alyp, el kó­leminde jergilikti halyqtyń talap-tilegin tyńdap, barlyq salada kó­mektesý úshin jolǵa shyq­qan «Me­niń Qazaqstanym» úgit-nasıhat poıyzy bur­naǵy kúni Qulsaryǵa kelip jetti.  Osy jerde Qandy­aǵashtan bet alǵan po­ıyzdy kútip alýshylar da kóp boldy. Poıyzdy asyǵa kútken halyq aldynda aýdan ákimi Rahmetolla Nuǵymanov pen «Nur Otan» HDP bastaýysh uıy­mynyń tóraǵasy Meń­dibaı Haırýllın sóz sóılep, jurt­shylyq atynan arnaıy poıyzdy uı­ym­dastyrýdyń bastamashysy bol­ǵan Elbasyna, bir aıdan beri elimizdiń ár óńirinde halyqtyń muń-muqtajyn tyńdap, kómek berip kele jatqan densaýlyq, áleýmettik qorǵaý, qarjy jáne zań salasynyń qyzmetkerlerine alǵys sezimderin bildirdi. Iá, aıtsa aıtqandaı, tórt kún­nen beri atalǵan poıyzdyń qu­ra­mynda bolyp, ár jerge aıaldap, ha­lyqtyń turmysymen jete tany­syp, jurtshy­lyqqa qoldan kelgenshe kómegin berip jatqan mınıstrlikter ókilderiniń jumysy el basqaryp otyrǵan azamat­tardyń osyn­daı  alǵysyna turarlyq. Osy kúni saltanatty sharadan soń, olar ádettegideı tańerteńnen keshke deıin halyqqa óz kómekterin kór­setýdi jalǵastyryp, iske kirisip ketti. Mun­da arnaıy poıyz ben jyljymaly medısınalyq keshen jáne oblystyń dárigerleri aýdandyq aýrýhanada ha­lyq­ty qabyldasa, basqa salalardyń qyzmetkerleri má­denıet úıinde zeı­netaqymen qamtamasyz etý jáne áleý­mettik saq­tandyrý, jumysqa orna­lasýǵa kómektesý, quqyqtyq jáne zańdyq keńes berý, shaǵyn jáne orta bıznesti qarjylandyrý, nesıelendirý boıynsha kezdesýler ótkizdi. Qabyldaý bólimderindegi halyq sanynda esep bolmady. Máselen, aý­dandyq aýrýhanada Densaýlyq saq­taý mınıstrligi medısınalyq kómekti uı­ym­dastyrý departa­men­tiniń bas sarap­shysy Ernar Myr­zaqulovtyń aıtýyn­sha, Qandyaǵash qalasynda mamandar 530 adammen kezdesip, dári­gerlik kómek berse, osyndaǵy qabyl­daýlarda dári­ger­ler keńes surap kelgen azamat­tardyń bárine qolda bar múmkin­diktiń bárin jasap otyrdy. Al mádenıet úıinde áleý­mettik máse­le­lerge baılanysty ótken kezdesýde Eńbek jáne halyqty áleý­mettik qor­ǵaý mınıstrliginen bólingen maman Raý­shan Kóshkinbekova azamat­tardy jumys­pen qamtý, áleýmettik kómek, zeınetaqy mólsherine qatys­ty máse­lelerdi qarady. Osynyń aldynda Qandyaǵash qalasynda onyń qabyl­daýynda 30 adam bolǵan edi. Sol kezdesýde mınıstrlik ma­many múgedek azamattarǵa 50 000 teńge kóleminde qar­jy aýdaryp berý máselesin sheshkenin bilemiz. Qulsarydaǵy qaby­l­daýynda da ol ózine eńbekke jaram­syzdyǵyna baı­lanysty kómek surap kelgen azamat­tarǵa, ataýly áleýmettik kó­mek, balalar járdemaqysy men zeınetaqyny kóbeı­tý, áleýmettik saqtandyrý boıynsha másele kó­tergen aýdan turǵyndaryna memleket tara­pynan beriletin jeńil­dikterdiń jo­lyn kórsetip,   halyq­tyń óz quqyq­taryn bilý úshin zań keńesterin berdi. El Táýelsizdiginiń  20 jyldyǵy qarsańynda jáne Qulsarynyń qala mártebesin alýynyń 10 jyldyǵyna oraı aýdan ortalyǵynda da zamanǵa saı aýqymdy jumystardyń jasalyp jat­qany kózge urady. Oblys ákimi Bergeı Rysqalıevtiń qoldaýymen Qul­saryny Atyraýdan keıingi sáý­letti de dáýletti qalaǵa aınaldyrý maq­satynda eń aldymen aýyz sý máse­lesin sheshý qolǵa alynǵany kórinip tur. Ol «Teńiz­shevroıl» JShs-nyń «Igilik» baǵdar­lamasy aıasynda iske asyrylyp, jyl sońynda paıdalanýǵa berilmek. Aýdan boıynsha gaz quby­ryn tartý, halyqty kógildir otynmen qamtý jaǵy tolyq sheshilgen eken. Al qalanyń kósheleri túgeldeı asfalt­talyp, trotýarlar tóselip, kósheleri alqyzyl gúldermen bezendirilip, ja­syl kóshetter boı kótergen. Qalada tipti buryn-sońdy tas jol kórmeı, mıdaı balshyqqa batyp jatatyn sha­ǵyn aýdandar men ýchaskelerge asfalt tóselipti. Soǵan turǵyn­dardyń bir jasap qalǵanyn kórýge bolady.  Jer­gilikti halyqty taǵy bir qýan­tatyny, Qulsaryda jańa orta mektep, jańa mádenıet úıi, balabaqsha ǵıma­rattary paıdalanýǵa berilipti. Taıaý ýaqytta eki qabatty aýdandyq emhana qurylysy aıaqtalmaq. Osyn­daǵy ókpe aýrýlary aýrýhanasynyń da jańadan salynyp, paıdalanýǵa berilýi kóp máseleniń sheshimin tabýyna sebep bolary sózsiz. Atyraý oblysy. * * * BEREKELI BEINEÝ Keshe aýdan ortalyǵy – Beıneý selosynyń temir jol vokzalynda poıyz delegasııasyn kútip alǵan halyqtyń sanynda esep bolmady. Sal­tanatty sharada úlken jolǵa shyq­qan azamattarǵa degen halyqtyń jyly­lyǵy, qýanyshy sezilip turdy. Osy jerde poıyzdy asyǵa kútken jurtshy­lyqtyń aldynda aýdan ákimi Basshy Ázirhanov, Uly Otan soǵysynyń ardageri Dúısen Kósherov sóz sóılep, Astanadan at terletip kelgen qaýymǵa rızashylyqtaryn bildirse, «Nur Otan» HDP-nyń Astana qalalyq fılıaly áleýmettik bastama­lardy taldaý jáne boljaý ortaly­ǵynyń meńgerýshisi Qazbek Qazykenov arnaıy poıyzdyń maqsat-mindetin aıtyp ótti. Beıneý aýylynda arnaıy sala mamandary qatysqan qoǵamdyq qabyl­daýlar joǵary deńgeıde ótip, halyq­tyń da, poıyz delegasııasynyń da kóńilinen shyqty. Bıyl aýdanǵa 39 jyl tolady eken. Qazir Beıneý aýy­ly­nyń kirpishi qalanǵan kezden beri aýyz toltyryp aıtarlyqtaı jumys­tar­dyń istelingeni kórinip tur. Aýdanda 53 000 adam tursa, Beıneý aýy­lynda halyqtyń sany 35 000-nan asady. Osy jerde aýdan ákimi Basshy Ázirhanovtyń 20 jyldan beri atqar­ǵan jumysyn atap ótý jón. 1991 jyly ákim bolyp kelgeli beri Basshy Aıjanaquly biraz sharýanyń ba­syn qaıyrypty. Búginde bul aýdan áleýmettik-ekonomıkalyq, halyqtyń turmystyq deńgeıi joǵary óńirlerdiń biri sanalady eken. Son­dyqtan da ony jurt­shylyq berekeli Beıneý dep tegin aıtpasa kerek. Aýdanda negizinen munaı-gaz salasy jaqsy damy­ǵan. Halyqtyń bári ju­mys­pen qamtylǵan. Al aýyldyń tynys-tirshiligi erekshe. Kósheler tolyǵy­men asfalttalyp, bezendirilgen. Bir atap ótetin nárse, qazir Beıneý aýdany Mańǵystaý oblysy bo­ıyn­sha bilim berý salasynda birinshi orynda tur. Aýdan ortalyǵynyń ózinde 11 bilim ordasy jumys isteıdi. Sonyń ishinde lıseı oqýshylary sońǵy 10 jylda 24 altyn belgini ıelense, 2008-2009 jyldary Chehııa­nyń Praga qalasynda  ótken halyq­aralyq ǵylymı jobalar baıqaýynda aǵyl­shyn tilinen kúmis medal, bıologııa páninen qola medal, 2009-2010 jyly Kıpr Respýblıkasynda Saltanat Ordabaeva esimdi oqýshy aǵylshyn tilinen jeńimpaz bolypty. 2010-2011 oqý jylynda Vengrııa­nyń Býdapesht qalasynda ótken baıqaýda bıologııa páninen Rahym Baıboz altyn medaldy jeńip alǵan. Beıneý lı­seıiniń dırektory Tańat Amal­baevtyń aı­týyn­sha, bilim orda­synyń oqýshylary respýblıka­lyq pándik olımpıadalarda 2008-2009 jáne 2009-2010 oqý jylynda quqyq páni boıynsha Álisher Taǵaberdi eki jyl qatarynan altyn medalǵa jáne tarıh páninen Nurbek Saǵıdollaev kúmis medalǵa ıe bolǵan. 2010-2011 oqý jylynda quqyq páni boıynsha Álibek Taǵa­berdın men qazaq tili páninen Ásel Asanova kúmis medal­dy ıelendi. Osy aýdandaǵy Beıneý gımnazııasynyń oqýshysy Azat Muhamedıev 2010-2011 oqý jylynda respýblıkalyq pándik olımpıadada tarıh páninen altyn medalǵa ıe bolyp, elimizdegi bilim satysynyń eń joǵarǵy kórsetkishiniń ıegeri atandy. Mańǵystaý oblysy. Dastan KENJALIN.