Arnaıy jasaq qyzmetkerine mınıstrdiń alǵys haty tabystaldy

12 jastaǵy balany qutqarǵan Astana qalasy IID jedel qımyldaıtyn arnaıy jasaqtyń aǵa ınspektory polısııa kapıtany О́mirjan Temirbekov Pavlodarda ótken «Qazirgi zaman qaharmany» respýblıkalyq baıqaýyna qatysty, dep habarlady elordalyq IID-niń baspasóz qyzmeti. Atalmysh is-shara erlikpen qaza tapqan ishki ister organdarynyń qyzmetkeri polısııa kapıtany,  «Halyq qaharmany» Ǵazız Baıtasovty eske alýdyń qurmetine ótkizildi. Sharaǵa beıbit zamanda ózderiniń qyzmettik mindetterin oryndaý kezinde erlik pen qaharmandyq tanytqan polıseıler qatysty. Eske salar bolsaq, oqıǵa 9 maýsym kúni saǵat shamamen 12:30-da  187 kóshesi boıyndaǵy Sarybulaq ózeninde boldy. Jumysqa bet alǵan polıseı ózen boıynda jıylyp turǵan balalardyń kómekke shaqyryp, ózen jaqqa qoldaryn siltep turǵanyn kórgen. Ol ýaqyt sozbaı, birden sýǵa sekirip túsip balany kóterip alyp shyqqan. Polısııa kapıtanynyń aıtýynsha balanyń júzi kókpeńbek bolyp, tynys almaı jatqan. Alaıda, onyń ómirin saqtap salýǵa barynsha tyrysqan О́mirjan alǵashqy medısınalyq kómekti kórsetýge kirisken. Balanyń keýdesine tikeleı massaj jasap, jasandy dem bergen. Ony kóterip alyp, denesin tizesine qoıyp, basyn tómenge qaratyp jutyp qoıǵan sýdy denesinen shyǵarǵan. Birneshe ret osylaı qaıtalaǵan soń tynys ala bastaǵan. Jedel járdem shaqyryp, balany baqylaýynda ustaǵan. Alǵashqy medısınalyq kómekti durys kórsetýdi atys-qyzmettik daıyndyq júıesinde úırengen daǵdylaryn is-júzinde qoldanǵan. Jedel járdem qyzmetkerleri kórsetken alǵashqy medısınalyq kómektiń durys jasalǵandyǵyn aıtty. Balanyń anasy Janar Aıtýreeva ulynyń ómirine arasha túsken qutqarýshyǵa alǵys aıtyp, qyzmetine tabys tiledi. Erlik tanytqan úshin Ishki ister mınıstri polısııa general-polkovnıgi Kalmuhambet Qasymovtyń atynan О́mirjan Temirbekovke gramota, quqyq qorǵaý organy músinshesi men qolsaǵat tabystaldy.