Ertis óńirinde «Meniń elim – Máńgilik el» forýmy ótti

Ertis óńirinde el Táýelsizdiginiń 25 jyldyǵyna oraılastyrylǵan «Meniń elim – Máńgilik El» respýblıkalyq forýmy ótti, dep habarlady Baq.kz. Qazaqstan halqy Assambleıasy muryndyq bolǵan aksııada patrıot ul-qyzdar bas qosty. Olar Elbasy Nursultan Nazarbaevtyń «Máńgilik el» jalpyulttyq patrıottyq ıdeıasyn nasıhattaýdy maqsat etken. Pavlodar oblysy ákiminiń orynbasary Baýyrjan Qasenov quttyqtaý sózinde Táýelsizdik jyldary Qazaqstan álem elderi arasynda beıbitshilik pen turaqtylyqtyń nyshanyna aınalyp úlgergenin atap ótti. «Qazirgi tańda Pavlodar oblysy áleýmettik-ekonomıkalyq turǵydan tabysty damýda. Jastarǵa qoldaý kórsetilip jatyr. Turǵyn úıler, jataqhanalar men áleýmettik nysandar boı kóterýde. Ertis óńirinde jastar saıasaty baǵytynda tolaǵaı tabystar bar. Máselen, Pavlodar oblysynda jastarǵa qyzmet kórsetý ortalyǵy elimiz boıynsha birinshi bolyp ashyldy. Búginde osy ortalyqta ilkimdi jobalar júzege asyrylýda», – dedi Baýyrjan Qasenov. Eske sala ketsek, respýblıkalyq aksııa 4 qarashada Taldyqorǵanda bastaý alǵan. Merekelik shara aıasynda jastar «Máńgilik el jastarynyń jetistikteri – Qazaqstan Respýblıkasy Táýelsizdiginiń 25 jyldyǵyna» atty kitapqa tilekterin jazdy. Keıin bul kitap Memleket basshysyna tabystalmaq. «Búgin Pavlodar qalasyna «Meniń elim – Máńgilik el» atty respýblıkalyq aksııasy uıymdastyryldy. «Máńgilik el» kitaby – aksııamyzdyń negizgi nyshany. Sol kitapqa árbir aımaqtyń jastary óziniń shırek ǵasyrda jetken jetistikterin jazady. Ertis óńirinen soń bul kitapty Shyǵys Qazaqstan oblysynyń jastaryna tabystaımyz», – dedi Qazaqstan halqy Assambleıasynyń jastar belsendisi Maksım Spotkaı.