«Temir baba» kedendik beketinen 2016 jyly 82 myń adam ótken

    Jyl basynan beri Qazaqstan men Túrkimenstannyń memlekettik shekarasyndaǵy «Temir baba» kedendik beketinen 82 myń adam ótti. Atalǵan bekettiń uzaqtyǵy 320 kılometrdi quraıdy, dep habarlady QazAqparat. «Jeke tulǵalarǵa keletin bolsaq, jyl basynan beri Qazaqstanǵa 41 myń adam kirgen, týra osynsha kólemdegi adamdar shekaradan syrtqa shyqqan. Júk tasymalyna keletin bolsaq, 3 myń 943 júk kóligi kirip, 3 myń 89 kólik shyqqan. Bizdiń bekette taýar aınalymy asa úlken emes. Sol sebepti munda ekonomıkalyq qylmystar sany da az. Munda negizinen ákimshilik materıaldardy tirkeımiz. Mundaı materıaldar sany 37 ret tirkeldi. Sońǵy ret biz úlken oqıǵa retinde 27 myń 900 dollardy deklarasııadan ótkizbeı alyp bara jatqan Túrkimenstan azamatshasymen baılanysty oqıǵany tirkedik. Atalmysh qarjy 33 jastaǵy áıeldiń júgin tekserý kezinde tabyldy. Sonymen qatar, ótkizý baqylaý beketindegi «tanymal» taýarlardyń qatarynda temekiler men qosalqy bólshekter bar», – dedi «Temir baba» kedendik beketiniń jetekshisi Abylaı Qazbaev. «Temir baba» beketine jaqyn Jańaózen qalasy 175 km qashyqtyqta ornalasqan.