Azamattyq qoǵamnyń alǵashqy nyshany

Almatyda ótken H Azamattyq forým úkimettik emes uıymdar men memlekettik organdardyń ózara árekettestiginiń jańa baǵyttaryn talqylap, úlken megapolıstegi mańyzdy máselelerdi birlese sheshý jolyn talqylaýdy maqsat tutty. «Bolashaǵymyz birlikte» degen uranmen ótken Azamattyq forýmnyń basty taqyryby Elbasy N.Nazarbaevtyń bes ınstıtýsıonaldyq reformasyn júzege asyrýdaǵy ÚEU-nyń rólin  kórsetýge arnaldy. Qoǵamdaǵy ár adamnyń belsendiligi men nemquraıly bolmaýynan kóp másele sheshimin tabady. Ol úshin ár azamat sergektik tanytyp, ÚEU kóteretin túrli bastamalarǵa azamattyq qoldaý bildirip, áleýmettik janjaldardy azaıtý úshin jaǵdaılar jasaýǵa, túrli áleýmettik toptardyń jumysyna janashyrlyqpen qaraýǵa, qoǵamdyq ınstıtýttardyń qatynas­taryn úılestirýge járdem berip úırengeni abzal. Qazaqstan halqy Assambleıasynyń múshesi, Almaty qalasyndaǵy koreı ulttyq ortalyǵy tóraǵasynyń orynbasary G.Kan Elbasynyń «100 naqty qadam» Ult josparyndaǵy 4-qadamǵa oraı, azamattyq birtutastyqty qalyp­tastyrýdaǵy qoǵamdyq uıymdar­dyń rólin atap kórsetti. G.Kannyń, ásirese, «árbir jeke adam men áleýmettik top­tardyń memlekettik tildi meńgerýimen birge qoǵamda kúrdeli bolyp kórinetin kóp másele birden oń sheshimin tabar edi» degen pikirine forýmǵa qatysýshylar qyzý qoldaý bildirdi. Azamattyq forýmdy uıym­das­tyrǵan Almaty qalasy Ishki saıasat basqarmasynyń basshysy Nurlan Sy­dyqov jıyn bastalar aldyn­daǵy kirispe sózinde: «Forýmnyń Táý­elsizdiktiń 25 jyldyǵy qarsańynda ótip otyrǵany biz úshin mańyzdy. Onynshy ret ótkizilip otyrǵanynyń ózi – Almatydaǵy aza­mattyq qoǵamnyń belsendiliginiń aıǵaǵy. Respýblıkamyz boıynsha 20 000 ÚEU tirkelgen bolsa, onyń 600-ge jýyǵy Almaty qalasyna tıesili. Azamattyq sektor – bul memleket pen turǵyndar arasyndaǵy altyn kópir» dep atap ótti. Qalalyq máslıhattyń depýtaty Konstantın Avershın senbi, jeksenbi kúnderi «Qalany qardan tazalaıyq!» atty aksııa uıymdastyryp, ózi restorator bolǵandyqtan, basqa áriptesterine ún qatyp, qolyna kúrek ustap, qar kúreýge shyqqan barlyq eriktilerdi ystyq aspen qamtamasyz etken. H Azamattyq forýmnyń aıasynda qoǵamdyq mańyzy bar jáne áleýmettik irgeli isterdi júzege asyrýda erekshe tabysqa jetken úzdik joba ıelerin anyqtap, marapattaıtyn «О́rleý-2016» syılyǵyn saltanatty tabystaý rásimi ótti. Bıylǵy «О́rleý-2016» baıqaýynyń jeńimpazdary bolyp respýblıkalyq «Ardagerler uıymy» qoǵamdyq birlestigi Almaty bólimshesiniń jetekshisi Erenǵaıyp Shaıhýtdınov, «Kómektes» qoǵamdyq uıymynyń jetekshisi Aleksandr Sapelkın, «Reliance» qo­ǵamdyq qorynyń tóraıymy Sáýle Alpysova, ekologııalyq baǵyttaǵy «Iа – almatınes» qoǵamdyq birlestiginiń basshysy Konstantın Avershın, «Avrora» qoǵamdyq qorynyń basshysy Rýben Kazarıan, «Sharapat» múgedekterdiń jastar uıymy» qoǵam­dyq birlestiginiń jetekshisi Raýshan Mananbaeva, «Dıabet qory» qoǵamdyq qorynyń basshysy Natalıa Týkalevskaıa, «Fond Jenskogo lıderstva» qoǵamdyq qorynyń tóraıymy Marııa Gýseınova, «Rodnık» qoǵamdyq uıymynyń tóraıymy Nına Balabaeva tanyldy. Úzdik jobalarymen úlken jetis­tikke jetken ÚEU-nyń jeńim­paz­daryn Almaty qalasy Ishki saıa­sat basqarmasynyń basshysy Nur­lan Sydyqov, Almaty qalasy Qoǵam­dyq keńesiniń tóraǵasy, «Turan» ýnı­versıtetiniń rektory Rahman Al­shanov, «Aqparattyq resýrs­tar ortalyǵy» qoǵamdyq qorynyń tór­aıymy Altynaı Kóbeeva marapattady. Jıynǵa qatysýshylar 25 qarasha kúni Astanada ótetin Qazaqstan Respýblıkasy Azamattyq forýmyna delegat bolyp baratyn úmitkerlerdi usynyp, olarǵa daýys berdi, ná­tıjesinde, 10 delegattyń esim-soıy naqtylandy. Aıgúl AHANBAIQYZY, «Egemen Qazaqstan» ALMATY