Ǵarysh termınderi sózdigi qazaq tilinde qurastyryldy

«Qazaqstan Ǵarysh Sapary» ulttyq kompanııa qyzmetkerleriniń bastamasymen ǵarysh termınderiniń orys-qazaq tilindegi sózdigi qurastyryldy, dep habarlady QazAqparat. «Bizdiń agenttikke «Qazaqstan Ǵarysh Sapary» UK» AQ memlekettik tildi damytý bóliminiń bas mamany Sholpan Malǵazdarovanyń aıtqanyndaı, termınologııalyq sózdikti jasaý jumystary 2006 jyly bastalǵan. «Qazaqstan iri ǵaryshtyq jobalardy jasaýǵa kirisip, ǵarysh salasyndaǵy tehnıkalyq, kúrdeli, arnaıy termınderdi aýdarýdyń qajettiligi týyndady», – dep eske aldy Sh.Malǵazdarova. Birneshe jyldar boıy ǵarysh termıninde jıi qoldanylatyn sózder toptamasy jınaqtalyp, búginde sózdikke ǵarysh qyzmetinde paıdalanylatyn 640 sózder men termınder, abbrevıatýralar men olardyń túsindirmesi kiristirildi. «Jaqynda ǵana salamyzǵa «dıstansıonnoe zondırovanıe Zemlı», «sıstema vysokotochnoı spýtnıkovoı navıgasıı» sekildi sóz tirkesteri endi jáne olardyń ana tilimizdegi naqty aýdarmalaryn berý kerek boldy, mysaly: Jerdi qashyqtyqtan zondtaý, joǵarydáldikti jerseriktik navıgasııa júıesi», – dedi sózdikti jasaý bastamashysy Sh.Malǵazdarova. Statıstıkaǵa súıensek, «Qazaqstan Ǵarysh Sapary» UK» AQ ujymynyń jartylaı derlik bóligi qazaq tilin úırený kýrstarynan ótip, sertıfıkattarǵa ıe boldy. Buǵan qosa, kýrs qatysýshylarynyń jartysynan kóbi qazaq tilinde erkin sóıleıtinder. Ázirge 2012 jyly Mádenıet jáne aqparat mınıstrliginiń arnaıy komıssııasy bekitken ǵarysh termınderiniń sózdigi elektrondy nusqada qoldanylýda. «Qazaqstan Ǵarysh Sapary» UK» AQ kompanııasynyń aldaǵy josparynda atalmysh zııatkerlik eńbektiń avtorlyq quqyǵyn belgilep, Qazaqstandaǵy tuńǵysh ǵarysh termınderiniń orys-qazaq tilindegi sózdigin shyǵarý bar.