О́nertanýshy Múptekeevtiń murasyna arnalǵan jıyn ótti

Qazaqtyń dástúrli óneriniń aıtýly ókilderi ult rýhanııatynyń altyn dińgegi desek, qatelespeımiz. Ultty ult retinde tanytatyn da, jahandaný zamanyndaǵy qaterden saqtaıtyn da halqymyzdyń rýhanı qundylyqtary men óreli óner týyndylary ekeni anyq. Sol dástúrli ónerimizdiń beldi de, bedeldi ókili, dombyrashy, zerdeli folklortanýshy, ónertaný ǵylymynyń kandıdaty Bazaraly Múptekeev edi. Ol osydan bir jyl buryn ómirden ozǵan bolatyn. О́nerdi ómirine serik etken abzal azamattyń artynda qalǵan baı murasyna arnalǵan halyqaralyq konferensııa búgin elordadaǵy Qazaq ulttyq óner ýnıversıtetinde ótti. Dástúrli ónerdiń teorııasy men praktıkasyna negizdelgen alqaly jıynda qazaq óneriniń arǵy-bergi tarıhy sóz boldy. Alǵashqy áńgimeni Qorqyt ata atyndaǵy ǵylymı zertteý ınstıtýty dırektorynyń orynbasary, belgili aıtys aqyny Shyrynbek Qoılybaev alyp, Bazaralynyń artynda qalǵan murasyna toqtalyp, ýnıversıtettiń rektory, Álem jáne Qazaqstannyń halyq ártisi, Eńbek Eri Aıman Musahodjaevanyń quttyqtaý hatymen tanystyrdy. Budan keıin osy halyqaralyq konferensııaǵa arnaıy Koreıa elinen kelgen IýNESKO-nyń Tynyq muhıt jáne Ortalyq Azııadaǵy materıaldyq emes mádenı murany saqtaý jónindegi ortalyǵy dırektory orynbasary, doktor Seıong-Iong Pak myrza Qazaq eliniń dástúrli óneri týraly óz baılamdaryn ortaǵa salyp, IýNESKO-nyń ókili retinde Bazaraly Múptekeevpen 3-4 jyl jumys istegenderin alǵa tartty. Sol kezde qazaq halqynyń dástúrlerimen tolyq tanysqanyn tilge tıek etip, halyqaralyq baılanystar jónindegi IýNESKO-nyń 2003 jylǵy konvensııasy týraly jan-jaqty baıandap berdi. Oǵan 71 eldiń múshe ekenin de eske salyp ótti. Ol sonymen birge, Bazaraly Múptekeevtiń artynda qalǵan murasyn jınaqtap, keıingi urpaqqa jetkizý máselesin de qozǵady. О́nertaný ǵylymynyń doktory, professor Gúlzada Omarova halyqaralyq konferensııaǵa arqaý bolyp otyrǵan azamattyń ár jyldardaǵy muralaryna taldaý jasasa, dosent Merýert Qurmanǵalıeva Bazaralynyń zertteý eńbekterin zerdeledi. Al magıstr Sanııa Bajeneeva qazirgi dástúrli mýzykany B.Múptekeevtiń ómirimen ushtastyrdy. О́ner ýnıversıtetiniń laboratorııa meńgerýshisi Saıda Elemanova qazaqtyń dástúrli óneri týraly oı qozǵady. Baǵlan Babajanova ónerimizdiń búkil qundylyǵy jınalǵan Qazaq radıosyndaǵy «Altyn qor» týraly oı qozǵap, sol ulan-asyr baılyqty elektrondyq formatqa túsirý isin bes jylda Bazaraly Múptekeevtiń basshylyǵymen atqarǵanyna naqty dálelder keltirdi. Sonyń ishinde 110 myń materıal jańa tehnıkaǵa kóshirilgenine uıytqy bolǵanyn, qorda joq 50 kúıdi de qaıta jańǵyrtqanyn atady. Shákirti Ardabı Máýlet ustazynyń ǵylymı zertteý kezinde kúndiz-túni jumys isteıtinin aıtyp, ol óner degende, sol ónerdi jasaǵan ulttyń jaqsylary týraly is bastasa, tún uıqysyn tórt bóletinin, Qazaq eliniń aýmaǵyndaǵy ǵana dátúrli ónerdi izdestirip qoımaı, Qytaı, Mońǵolııa, ózge de memleketterdegi óner týyndylaryn Otanymyzǵa qaıtarý úshin kóptegen ekspedısııalarǵa jetekshilik jasaǵanyn da alǵa tartty. Eki kúnge josparlanǵan halyqaralyq konferensııa seksııalyq jumystarmen jalǵastyrý kózdelgen. Súleımen Mámet, «Egemen Qazaqstan»