Yrǵyzǵa gaz berildi

Yrǵyz – gazdandyrylǵan sońǵy aýdan ortalyǵy. Endi oblystyń barlyq aýdan ortalyqtarynyń turǵyndary  kógildir otynnyń ıgiligin kóretin boldy.   «QazTransGaz» AQ  aýdan ortalyǵyndaǵy kóshearalyq jáne jetkizýshi gaz qubyrynyń qurylysyn aıaqtap, 6 myń turǵyndy kógildir otynmen qamtamasyz etip otyr. Bul maqsatta avtomattandyrylǵan gaz taratý stansııasy, blokty gaz retteý pýnkti, 38 shkafty gaz retteý pýnkti, 164 shaqyrym jetkizýshi gaz qubyry men uzyndyǵy 53 shaqyrymdy quraıtyn kóshearalyq gaz qubyry salyndy. Saltanatty sharada sóz alǵan oblys ákimi Berdibek Saparbaev bıylǵy jyl  Qazaqstan úshin aıryqsha mańyzdy ekenine,  elimizdiń Táýelsizdiktiń 25 jyldyǵyn merelegeli otyrǵanyna toqtaldy. Egemendik alǵan kúnnen bastap Elbasymyz Nursultan Nazarbaevtyń júrgizip otyrǵan saıasaty halyqtyń ál-aýqatyn jaqsartýǵa baǵyttalǵanyn, sonyń jarqyn kýási Yrǵyzǵa gaz kelgenin jetkizdi. -Qazir oblystyń 92 paıyz halqy gazben qamtamasyz etildi. Osynyń barlyǵy elimizdiń ekonomıkasy damýynyń, Memleket Basshysynyń óziniń halqyna jasaǵan qamqorlyǵynyń nátıjesi. Osy qurylysqa 6 mıllıard teńgeden astam qarjy jumsaldy. Endi jyldyń sońyna deıin keminde 250 úı, 30-dan astam mekeme gazǵa qosylady. Odan keıin úıler daıyndyǵyna baılanysty birte-birte gazǵa qosylatyn bolady. Endi gaz qubyrynyń boıynda ornalasqan 4 eldi mekendi de qamtý oılastyrylýda, - dedi óńir basshysy. Odan soń «QazTransGaz» AQ Aqtóbe óndiristik fılıalynyń dırektory Amanjol Tájiǵalıev, eńbek ardageri Nurqasym Sársenbaıuly jáne basqa sóıleýshiler izgi tilekterin bildirip, aýdan turǵyndary atynan eńbek ardageri Amantaı Nurbaev aq batasyn berdi. Joǵaryda atalǵan azamattarmen birge Berdibek Saparbaev gaz taratý qondyrǵysyn  saltanatty jaǵdaıda iske qosty. Satybaldy SÁÝIRBAI, «Egemen Qazaqstan» Aqtóbe oblysy, Yrǵyz aýdany.