Túrkistanda 10 kommýnaldyq nysan iske qosyldy

Táýelsizdiktiń 25 jyldyq mereı toıy qarsańynda Túrkistandaǵy birqatar eldi mekender men shaǵyn aýdan turǵyndary aýyz sý jáne sapaly elektr energııasymen qamtamasyz etildi, dep habarlaıdy Túrkistan qalasy ákiminiń baspasóz qyzmeti. Turǵyndar aldynda sóz alǵan shahar basshysy qalada jasalǵan jumystardyń barlyǵy da Elbasymyz N.Nazarbaevtyń eline degen qamqorlyǵy men salıqaly saıasatynyń arqasynda ekenin aıtty. Bul kúni Túrkistanda bes nysanda aýyz sý qubyrlary jáne qalanyń ulǵaıýyna baılanysty jańa turǵyn úılerge sapaly elektr qýatyn taratý úshin bes aımaqta elektr jelileri iske qosyldy. Bul nysandardyń jalpy quny 4 mlrd. 904 mln. teńgeni qurap otyr. Sonyń ishinde aýyz sýǵa 3 mlrd. 438 mln. jáne elektr jelilerin ornatýǵa 1 mlrd. 465 mln. teńge bólingen. Mamandardyń aıtýynsha, iske qosylǵan nysandardyń esebinen Túrkistan qalasy aýmaǵynda turǵyndardy aýyz sýmen qamtý 90 paıyzǵa jetip, bıyl 15 myńnan astam abonent taza sý tutynýǵa qol jetkizip otyr. Al 2016 jyly qala aýmaǵyndaǵy 5 myńnan astam abonent sapaly elektr qýatymen qamtyldy. Osylaısha jalǵasyn tapqan Túrkistandaǵy kommýnaldyq qyzmet sapasynyń arta túskenine kýá bolyp otyrǵan «Bekzat» móltek aýdanynyń turǵyny Ábdiǵalı Sandybaı óńirlerde memleket basshysynyń pármenimen júrgizilip jatqan jumystarǵa júrek jardy qýanyshyn jetkizip, jańadan qonystanǵan turǵyn úılerge aýyz sý, elektr qýaty jáne jol salynǵanyn naǵyz órkenıetti eldiń jumysy dep baǵalady. Aıta keterligi, Túrkistandaǵy Táýelsizdikke tartý retindegi ıgilikti sharalar tek munymen toqtap qalmaq emes. Aldaǵy kúnderde shalǵaı aýyldardaǵy ózen kópirleri, kóshelerdi jaryqtandyrý sekildi kommýnaldyq qyzmet sapasyn arttyrý baǵytynda túrli el qajetine jaraıtyn nysandar sany arta túspek.