Qazaq týyn kótergen Golovkınmen bokstaspaımyn - Nasıollauly

Qytaıda turatyn 22 jastaǵy Beısen Nasıollaulyna qazaqstandyq kásipqoı boks sheberi Gennadıı Golovkınge qatty uqsaıtyndyǵyna baılanysty «One G» degen laqap at qoıylǵan, dep habarlaıdy «QazAqparat». «Men bir jyl buryn Genamen birge túsken sýretimdi jarııalap, oǵan qatysty jalǵan aqparat taraǵanyna kýá boldym. Biz onymen Iýnnan provınsııasynyń Kýnmın qalasynda 2015 jyly WBC-tiń jyldyq eseptik otyrysynda kezdesken edik. Negizi, teorııa júzinde men onymen rıngke shyǵa alam, alaıda qazir men eki salmaq tómen dárejede jattyǵam. Mende ondaı múmkindik bolǵan kúnniń ózinde, Golovkınmen jekpe-jekke shyqpas edim. Sebebi ol qazaqstannyń týyn bıikterge kóterip júrgen jigit. Men Qazaqstan azamaty bolmasam da, qanym qazaq. Sondyqtan onymen básekeles bolmas edim», deıdi Baıshan Bo (qytaılyqtar ony osylaı ataıdy eken) QazAqparatqa bergen suhbatynda. Beısen, sondaı-aq, ony qazaq tiline shorqaq dep jazylǵan aqparattyń shyndyqqa janaspaıtynyn da aıtyp ótti. Qazirgi sátte qandasymyz 17 jeltoqsanda avstralııalyq bylǵary qolǵap sheberimen jeńil salmaqta WBA nusqasy boıynsha Azııa chempıony ataǵy úshin ótetin jekpe-jekke qyzý daıyndalyp jatqanyn jetkizdi. Aıta keteıik, Beısen Nasıollauly kásipqoı rıngte 11 jekpe-jek ótkizip, 10-ynda jeńiske jetken (5-eýi nokaýt), bir kezdesý teń aıaqtalǵan.